<p style="text-align: justify;">کابل (پژواک، ۲۳ لړم ۱۴۰۲): د پښتون ژغورنې غورځنګ «پيټياېم» یو مخکښ غړی علي وزیر د بلوچستان چمن پرلت کې له وینا وروسته نیول شوی دی.</p>
<p style="text-align: justify;">د راپورونو له مخې، له تېرو نږدې درېیو اوونیو راهیسې په چمن کې ګڼ شمېر خلکو پرلت پیل کړی او د پاکستان د هغې پرېکړې پرضد اعتراض کوي چې د ډیورنډ کرښې دواړو غاړو خلکو ته ویل شوي چې د تګ راتګ لپاره باید پاکستانۍ ویزه ولري.</p>
<p style="text-align: justify;">د بيبيسي <strong><a href="https://www.bbc.com/pashto/articles/cx917qlly8ko?at_medium=social&at_link_id=DC9F062E-82D2-11EE-9E1E-6CFAA9F30DC0&at_campaign=Social_Flow&at_link_origin=BBC_Pashto&at_campaign_type=owned&at_link_type=web_link&at_format=link&at_ptr_name=facebook_page&at_bbc_team=editorial&fbclid=IwAR30kq8kfyElXXISw69vULXmTlFXfmrUu2tJvL5LrMANpqBkSIuxnO627xQ">راپور</a> </strong>له مخې، علي وزیر نن په یاده غونډه کې ویلي: «نه ازغن تار منو، نه پاسپورټ منو، نه پنجابي ریاست منو، موږ د لوی افغانستان خلک وو، یو او اینده کې به هم یو. ملګرو دا یاد وساتئ نن دا د چمن پرلت د چمن د خلکو مسله نه ده، دا د کار او بار مسله نه ده، بلکې دا د دوی د افغانیت سوچ دی. دا د ډیورنډ لاین د نه منلو سوچ دی.»</p>
<p style="text-align: justify;">سرچینې لیکلي چې پولیسو غوښتل علي وزیر په بلوچستان کې ونیسي، خو هلته یې پلویانو پولیسو ته اجازه نه ده ورکړې چې ویې نیسي، خو کله چې ډېره اسماعیل خان ته رسېدلی، هلته پولیس ورته ولاړ وو او نیولی یې دی.</p>
<p style="text-align: justify;">د پښتون ژغورنې غورځنګ دغه مخکښ غړی او د پاکستان پارلمان کې د جنوبي وزیرستان د خلکو مخکېنی استازی علي وزیر د ۲۰۲۰ میلادي کال په ډسمبر میاشت کې د پېښور پولیسو ونیوه او بیا د روان کال په فبرورۍ کې له ۲۶ میاشتو زندان تېرولو وروسته خوشي شوی و.</p>
<p style="text-align: justify;">هغه مهال په علي وزیر تور چې د پاکستاني ریاست، پوځ او استخباراتو پر ضد يې په ولسي غونډو کې ویناوې کړې دي.</p>
