د افغانستان کرنې وزارت د ازبکستان له یوه پوهنتون سره د همکارۍ هوکړه‌لیک لاسلیک کړی

کابل (پژواک، ۳ لېندۍ ۱۴۰۲): د اسلامي امارت ویاند ذبیح‌الله مجاهد ويلي چې د کرنې او مالدارۍ وزارت د ازبکستان کرنې له پوهنتون سره د زده‌کړو او تجربو شریکولو برخه کې هوکړه‌لیک لاسلیک کړی دی.

مجاهد پر خپله اېکس‌پاڼه لیکلي چې د افغانستان د کرنې وزارت او ازبکستان کرنې پوهنتون ترمنځ دغه هوکړه‌لیک پرون د یاد هېواد په پلازمېنه تاشکند کې لاسلیک شوی دی.

هغه زیاته کړې چې دغه هوکړه‌لیک د کرنې وزارت د مرستیال مولوي صدراعظم عثماني او په تاشکند کې د ازبکستان کرنې پوهنتون لومړي مرستیال اسلاموف له لوري د دغه هېواد د اوبولګولو وزیر او یو شمېر نورو چارواکو په حضور کې لاسلیک شو.

سرچینې لیکلي، د دغه هوکړه‌لیک پر بنسټ به د دواړو هېوادونو متخصصین د کرنې، اوبولګولو او مالدارۍ برخو کې خپلې تجربې له یو بل سره شریکوي او دغه راز د کرنې وزارت ۶۰ بزګرانو او متخصصینو ته به د ازبکستان په کرنې پوهنتون کې د لنډمهال او منځمهاله زده‌کړو زمینه برابره شي.

د یادونې ده، د لړم په ۳۰مه د افغانستان د کرنې، اوبولګولو او مالدارۍ وزارت د مرستیال په مشرۍ یو پلاوی د کرنې او مالدارۍ برخو کې د پانګوالو ترمنځ د اړیکو او همغږۍ پیاوړتیا په موخه ازبکستان ته سفر کړی دی.