فاریاب کې په جلا پېښو کې دوه کسان وژل شوي او درې نور ټپیان دي

میمنه (پژواک، ۴ لېندۍ ۱۴۰۲): فاریاب ولایت کې سیمه‌ییزې سرچینې وايي چې د پښتونکوټ ولسوالۍ په مربوطاتو کې دوه کسان د یوه حکومتي کس په ګډون وژل شوي او په میمنې ښار کې د یوې ترافیکي پېښې له امله درې کسان ټپیان شوي دي.

د فاریاب د اطلاعات او فرهنګ رییس مولوي شمس‌الدین محمدي یاده پېښه تاییدوي، خو ویې ویل چې تر اوسه د قضیې اړوند جزییات یې نه دي ترلاسه کړي.

خو د پښتونکوټ ولسوال قاري عبدالوکیل متوکل وايي: «د رحمت‌الله په نوم زموږ یو سرتېری د لېندۍ په ۳مه د جمعې په ورځ له غرمې مخکې په ندیراباد سیمه کې د خپل یوه ملګري له لوري وژل شوی او قاتل له غرمې وروسته له امنیتي ځواکونو سره په نښته کې ووژل شو.»

متوکل وویل چي رحمت‌الله د پښتونکوټ د قره‌کل کلي اوسېدونکی تېره ورځ ندیراباد سیمې ته د خپل ملګري هدایت‌الله لیدو ته - چې محصل او ښوونکی هم وو- ورغلی چې هلته د نوموړي له لوري په ډزو ووژل شو.

نوموړي زیاته کړه چې په قتل تورن کس د پېښې له ځایه تښتېدلی او د کلي په منځ کې په یوه کدانه کې پټ شوی و چې د امنیتي ځواکونو د پلټنې او تلاشۍ پر مهال یې ډزې کړې او په مقابلو ډزو کې وژل شول شوی دی.

د یوه بل خبر له مخې د میمنې ښار په لومړۍ ناحیه کې د یوې ترافیکي پېښې له امله درې کسان ټپيان شوي دي.

د فاریاب د ترافیکو امریت د پېښو مدیر احمد فهیم کوهي پژواک ته وویل چې تېر مازدیګر پر موټرسایکل سپاره درې ځوانان د دمقول په لاره یوه کانال ته لوېدلي چې د دې پېښې له امله درې واړه ټپیان شوي او یو یې د کوما په حالت کې دی.