<p style="text-align: justify;">ترینکوټ (پژواک، ١٦ لېندۍ ۱۴۰۲): د اروزګان امنیه قومانداني وايي چې د دغه ولایت په دهراوود او چورې ولسوالیو کې د نشهیي توکو د پروسس دوه کارخونې له منځه وړل شوې دي.</p>
<p style="text-align: justify;">د اروزګان د امنیې قوماندانۍ ویاند بلال اروزګاني وویل، د نشهیي توکو پر وړاندې د مبارزې منسوبینو تېره شپه د دهراوود ولسوالۍ په زرتالې سیمه کې د نشهیي توکو د پروسس یوه کارخونه له منځه وړې ده.</p>
<p style="text-align: justify;">هغه زیاتوي چې له دې کارخونې یوه پایه ژرنده، ١٠٠ کیلوګرامه هاک، ١٢٠ کیلوګرامه پروسس شوي ومان، ٢٧٠ لېتره ډېزل تېل، ١٧ دانې بېرلې او ٤٠ لېتره بېلابېل ډوله مایع نشهيي توکي ترلاسه شوي چې ټول منځه وړل شوي دي.</p>
<p style="text-align: justify;">دغه راز د قوماندانۍ ویاند وایي، د چورې ولسوالۍ په کوتل سیمه کې د ومان د تولید او پروسس یوه بله کارخونه هم تېره شپه له منځه وړل شوې ده.</p>
<p style="text-align: justify;">هغه زیاتوي چې په دې کارخونه کې ٢٢٥ کیلوګرامه میده شوي ومان، ١٥٠ کیلوګرامه سود، ١٢٠ لېتره تېزاب، ٥٠ کیلوګرامه هاک، پنځه کیلوګرامه یوف، ٨٠ لېتره ډېزل تېل، یوه ژرنده او درې بېرلې له منځه وړل شوي دي.</p>
<p style="text-align: justify;">اروزګانی وایي چې د دغو نشهيي توکو په تړاو یو کس نیول شوی او یو بل تورن کس له سیمې تښتېدلی دی.</p>
