جلالاباد (پژواک، ۲۶ لېندۍ ۱۴۰۲): د لوړو زدهکړو وزارت لخوا د ننګرهار پوهنتون ته د جیولوجي او معدن پوهنځی منظور او د کرنې پوهنځي درېیو څانګو ته یې د ماسټرۍ برنامې رامنځته شوې.
د لوړو زدهکړو وزارت سرپرست مولوي نداءمحمد ندیم د لېندي په ۲۶مه د دغو پروګرامونو د پرانیستې په موخه ننګرهار ته تللی و.
نوموړي د دغو برنامو د پرانیستې په مراسمو کې وويل، د ځانګړې طرحې له مخې يې ټولو هغو پوهنتونونو ته چې په شرايطو برابر دي د دوکتورا او ماسټرۍ برنامې منظور کړي دي.
نوموړي زیاته کړه: «ننګرهار پوهنتون کرنې پوهنځي کې د اګرانومۍ، هارتيکلچر او کرنيزو توليداتو ځنځيروي ارزښت په څانګو کې د ماسټرۍ برنامې او د جیولوجي او معدن پوهنځی منظور او نن پرانېستل شول.»
هغه وویل، ننګرهار پوهنتون د هېواد په تعليمي او تحصيلي ډګر کې ځانګړی نوم او مقام لري او دغه پوهنتون ته به په ټولو برخو کې لازمه پاملرنه وکړي.
د لوړو زده کړو وزير دغه راز وويل چې په دې ولايت کې د اسلامي پوهنتون ساحه له نږدې ګوري او هڅه کوي چې له مرکزي ادارې سره په همکارۍ او همغږۍ يې د جوړونې چارې پيل کړي.
د ننګرهار پوهنتون مرستيال احسانالله ناصح د لوړو زده کړو وزارت له سرپرسته مننه وکړه چې دغه پوهنتون ته يې د پاملرنې په لړ کې شاوخوا ۲۱ پروژې پلې شوي دي.
د ننګرهار پوهنتون د کرنې پوهنځي رييس پوهنوال رشاد احمد شېرزاد د ياد پوهنځي په چوکاټ کې د ماسټرۍ برنامو پيلېدل اړين وبلل او ډاډ يې ورکړ چې د دغو برنامو برياليتوب په موخه به لازمې هڅې تر سره کړي.
ننګرهار پوهنتون په هېواد کې يو له پخوانيو پوهنتونونو دی چې له نيمې پېړۍ ډېر مزل يې کړی او اوسمهال د لېسانس، ماسټرۍ او دوکتورا تر کچې زده کړې په کې کېږي.
