<p style="text-align: justify;">کابل (پژواک، ۳ مرغومی ۱۴۰۲): د افغانسان کرکټ بورډ وایي چې له ۱۹ کلنو کمعمره افغان لوبډله له سوېلي افریقا او هند سره د درې اړخیزه لوبو ترسره کولو په موخه نن سوېلي افریقا ته ولاړه.</p>
<p style="text-align: justify;">د افغانستان کرکټ بورډ پر خپله فېسبوکپاڼه لیکلي، له ۱۹ کلنو کمعمره لوبډله د هند او سوېلي افریقا لوبډلو پر وړاندې د درې اړخیزې لوبلړۍ ترسره کولو په موخه نن له متحده عربي امارتو سوېلي افریقا ته روانه شوه.</p>
<p style="text-align: justify;">دا په داسې حال کې ده چې له ۱۹ کلنو کمعمره افغان لوبډله نړۍوال جام سیالیو ته د چمتووالي په موخه څه موده مخکې عربي اماراتو ته تللې وه.</p>
<p style="text-align: justify;">د یادو درې هېوادونو لوبډلو ترمنځ د کرکټ دغه سیالۍ د سوېلي افریقا په کوربهتوب د روانې ډسمبر میاشتې په ۲۹مه پیلېږي او د را روان ۲۰۲۴ کال د جنورۍ تر ۱۰مې به دوام ولري.</p>
<p style="text-align: justify;">افغانستان به په یاده درې اړخیزه لوبلړۍ کې خپله لومړۍ لوبه د ډسمبر په ۲۹مه له هند او دویمه به د ډسمبر په ۳۱مه له سوېلي افریقا سره ترسره کړي.</p>
<p style="text-align: justify;">دغه راز افغان لوبډله به خپله درېیمه لوبه د ۲۰۲۴ کال د جنورۍ په څلورمه له هند او دغه راز وروستۍ او څلورمه سیالۍ به د همدې میاشتې په ۸مه له سوېلي افریقا سره ترسره کړي او له هغه وروسته به د دوو غوره لوبډلو ترمنځ د جنورۍ په ۱۰مه پایلوبه ترسره شي.</p>
<p style="text-align: justify;">د یادونې ده، له یادو سیالیو وروسته به افغان لوبډله د راتلونکي ۲۰۲۴ کال له ۱۹ کلنو کمعمره د کرکټ نړۍوال جام کې ګډون وکړي چې د جنورۍ په ۱۹مه په سوېلي افریقا کې پیلېږي.</p>
