اروزګان کې د اوو چکډیمونو جوړېدو چارې پيل شوې

<p style="text-align: justify;">ترینکوټ (پژواک، ۳ سلواغه ۱۴۰۲):، د اروزګان ولایت په مرکز او ولسوالیو کې د ۱۸ میلیون افغانۍ په لګښت د اوو چکډیمونو جوړولو چارې پيل شوې.</p>

<p style="text-align: justify;">د یادې پروژې پرانیستې پرمهال مسوولینو وویل، د رییس‌الوزرا د ځانګړي حکم پر اساس اروزګان کې اووه چکډیمونه منظور شوي دي.</p>

<p style="text-align: justify;">د اروزګان والي مولوي محمدعلي جان وایي، د باران د اوبو مهارولو لپاره دا منظور شوي چکډيمونه به یو په مرکز او شپږ په ولسوالیو کې جوړ شي.</p>

<p style="text-align: justify;">هغه زیاته کړه، دا پروژه د ولسونو په خوښه پلې کېږي چې په بشپړېدو سره به یې لسګونه زره جریب ځمکه خړوبه شي.</p>

<p style="text-align: justify;">د اروزګان د کرنې ریاست ویاند مولوي عبدالمنان فاروقي وویل، د ۱۸ میلیون افغانۍ په لګښت د یادې پروژې مالي لګښت د کرنې وزارت له خوا ورکول کېږي.</p>

<p style="text-align: justify;">هغه زیاتوي، د یو کال په موده کې د دغو اوو چکډیمونو رغنیزو چارو کې به په ورځنۍ توګه لسګونو کسانو ته کاري زمینه برابره شي.</p>

<p style="text-align: justify;">د اروزګان خلک خوشحاله دي چې سیمه کې یې د اوبو مهارولو لپاره چکډیمونه جوړېږي.</p>

<p style="text-align: justify;">د اروزګان چنارتو ولسوالۍ یوه اوسېدونکي عبدالسلام وویل، پرله پسې وچکالیو او د اوبو کچې ټيټوالی د دې لامل شوی چې د خلکو کرنیزې ځمکې شاړې شي.</p>

<p style="text-align: justify;">هغه په سیمه کې د تازه جوړېدونکي چکډیم د پروژې چارو خوشحاله کړی او هیله لري چې په دې سره به د اورښتونو اوبه مهار شي او دوی به ورڅخه ګټه واخلي.</p>