هرات، پاراخ (پژواک، ۵ سلواغه ۱۴۰۲): ځایي مسوولین وایي چې په هرات او پنجشېر ولایتونو کې د ترافیکي پېښو له امله درې کسان مړه او ۹ نور ټپیان شوي دي.
د هرات د امنیه قوماندانۍ ویاند عبدالله انصاف پژواک ته وویل، چې نن مازدیګر د کشک رباط سنګي ولسوالۍ په بند بقرچر سیمه کې یوه ترافیکي پېښه رامنځته شوې چې له امله یې دوه کسان مړه او اووه نور ټپیان شوي دي.
ده وویل چې ټپیان د امنیتي کسانو له لوري روغتون ته لېږدول شوي دي.
د یو بل خبر ل مخې، نن د پنجشېر ولایت مرکز کې هم د ترافیکي پېښې له امله یو کس مړ او دوه نور ټپیان شوي دي.
د پنجشېر د ترافیکي پېښو مدیر وحیدالله حمید پژواک ته وویل چې یو کرولا موټر د سړک په غاړه د کور له دېوال سره ټکر کړی دی.
هغه زیاته کړه چې په دې پېښه کې یو کس مړ او دوه نور ټپیان شوي دي.
