<p style="text-align: justify;">ترینکوټ (پژواک، ۱۱ سلواغه ۱۴۰۲): ترینکوټ ښار کې مهراباد روغتیايي مرکز لپاره د ۳۰۰ زره امریکايي ډالرو په لګښت ودانۍ جوړه او ګټې اخیستنې ته وسپارل شوه.</p>
<p style="text-align: justify;">د اروزګان د عامې روغتیا رییس ډاکتر محمدالله روحاني وویل، یاده ودانۍ د ملګرو ملتونو د کډوالو عالي کمېشنرۍ (UNCHR) په مالي ملاتړ ترینکوټ ښار کې مهراباد روغتیایي مرکز لپاره پر درې جریب ځمکه د یو کال په موده کې د ۳۰۰ زره امریکایي ډالرو په لګښت جوړه شوې ده.</p>
<p style="text-align: justify;">نوموړي زیاته کړه، د یاد روغتیایي مرکز ودانۍ، ۱۲ خونې، تشنابونه، د څښاک پاکې اوبه او احاطوي دېوال لري.</p>
<p style="text-align: justify;">د هغه په خبره، په دغه مرکز کې به د لومړنیو روغتیايي خدماتو ترڅنګ، نسایي ولادي او خوارځواکۍ برخو کې ۴۰ زره کسانو ته خدمات وړاندې کېږي.</p>
<p style="text-align: justify;">روحاني وویل، یاد روغتیایي مرکز له دې مخکې ودانۍ نه درلوده او په یوه کرایه کور کې پرانیستل شوی و.</p>
<p style="text-align: justify;">ورته مهال دغه ولایت کې دUNCHR سیمهییز مسوول کیمیني بوزویا «Kimenyi Buzoya» وویل، له نورو همکارو ادارو سره په ګډه به د دغه ولایت له خلکو او په ځانګړې توګه له تازه راستنو شوو کورنیو سره خپلې مرستې جاري ساتي.</p>
<p style="text-align: justify;">هغه زیاته کړه، د دغه روغتیایي مرکز ترڅنګ یې اوسمهال په ترینکوټ ښار کې د یوه بل روغتیایي مرکز او یوه ښوونځي لپاره د ودانیو جوړولو چارې پیل کړې دي.</p>
<p style="text-align: justify;">نوموړي وویل، په پلان کې لري چې د روان میلادي کال په اوږدو کې په مرکز، دهراوود او چورۍ ولسوالیو کې د دوه روغتیایي مرکزونو او یوه ښوونځي د ودانۍ په ګډون بېځایه شوو کورنیو ته ۷۸ بابه کورونه هم جوړ کړي.</p>
<p style="text-align: justify;">له دې سره د سیمې خلک یاد روغتیايي مرکز لپاره د ودانۍ په جوړېدو خوښي ښيي او زیاتوي چې د روغتیایي خدماتو برخه کې به یې یو څه ستونزې حل شي.</p>
