د کندوز قلعه‌ذال یو شمېر اوسېدونکي وايي، د امو سیند غاړو تحکیماتو پروژې دې ډېرې شي

کندوز (پژواک، ۱۱ سلواغه ۱۴۰۲): د کندوز د قلعه‌ذال ولسوالۍ یو شمېر اوسېدونکي چې د امو سیند څېرمه یې کورونه دي، له سرپرست حکومته غوښتنه کوي چې د امو سیند غاړو تحکیماتو برخه کې ډېرې پروژې پلې کړي.

د قلعه‌ذال د قولخ‌تپې سیمې اوسېدونکي عبالباسط پژواک خبري اژانس ته وویل، سرپرست حکومت د دې سیمې په څو برخو کې د تحکیماتو پروژې عملي کړې چې ښه نتیجه یې ورکړې ده خو اوس هم زیانمنونکې ساحې شته، که تحکیم نه شي، سیند یې لاندې کوي.

هغه زیاته کړه: «کومې پروژې چې په قولخ‌تپه کې عملي شوې، پرې خوشاله یو، له اسلامي امارته غواړو چې د قولخ‌تپې ترڅنګ په باغیچه، بغریکول او خشت‌تپې سیمو کې نورې پروژې هم عملي کړي.»

بلخوا، د قلعه‌ذال ولسوالۍ یو بل اوسېدونکی عبدالکریم چې امو سیند څېرمه اوسېږي، وايي، په وروستیو څو کلونو کې د امو سیند څپې د زرګونه جریب ځمکې ویجاړېدو لامل شوې دي.

نوموړي زیاته کړه: «خلکو کډې کړې، زرګونه جریب ځمکه اوبو لاندې کړې، موږ له دې امله چې کورونو مو اوبو لاندې کړي، دښتو او هوارو کې مو کورونه جوړ کړي دي.»

د قعله‌ذال یو شمېر نور اوسېدونکي هم له حکومته غواړي چې د امو سیند غاړې تحکیم کړي.

ورته مهال، د امو سیند غاړې تحکیماتو ریاست تخنیکي سلاکار انجنیر حمیدالله ولي‌زاده وايي، په روان کال کې یې د قلعه‌ذال ځینو ساحو کې څو پروژې عملي کړې او پلان لري څو په زیانمنونکو ساحو کې لا ډېرې پروژې عملي کړي.

هغه څرګنده کړه: «روان کال کې مو د کندوز په قلعه‌ذال ولسوالۍ کې څو تحکیماتي پروژې پیل کړې چې اوس یې کارونه روان دي، ان‌شاءالله هغه ساحې چې تر اوسه نه دي تحکیم شوې، هڅه کوو چې پلان کې یې ونیسو.»

دا په داسې حال کې ده چې د اسلامي امارت له بیاځلي واکمنېدو وروسته د امو سیند غاړو د تحکیماتو چارې پیل شوې دي.

د کندوز اوسېدونکي د یادو پروژو پر پلې کېدو خوښ دي خو کافي یې نه بولي.