مزارشریف (پژواک، ۱۶ سلواغه ۱۴۰۲): د عامې روغتيا سرپرست وزير وايي چې دا مهال په هېواد کې د ناروغانو لپاره ټولټال ۱۱ زره بستره دي، خو په ابتدایي ډول ۴۵ زره بسترونو ته اړتیا ده.
د عامې روغتيا وزارت سرپرست وزیر ډاکټر قلندر عباد دا څرګندونې د سلواغې په ۱۵مه، بلخ ته د خپل سفر پرمهال د ابو عليسینا بلخي روغتون له مسوولينو او ډاکټرانو سره په ليدنه کې وکړې.
نوموړي زیاته کړه، په روغتیایي سکټور کې مهم دا دي چې د ډاکټرانو ظرفيت لوړ شي، څو هېواد د سیمې او نړۍ په کچه متخصص او باتجربه ډاکټران ولري.
هغه وويل: «ټول هېواد کې شاوخوا ۱۱ زره بستره لرو، خو د هېواد د اوسني نفوس او ناروغانو ته په کتو سره باید موږ حداقل په ابتدایي ډول ۴۵ زره بستره ولرو.»
هغه په ټول هېواد کې د عادلانه روغتیایي خدمتونو پر رسولو ټینګار وکړ او زیاته یې کړه چې متخصص ډاکټران باید یوازې ښارونو کې پاتې نه شي، بلکه لرې پرتو سیمو ته هم لاړ شي او خلکو ته روغتیایي خدمتونه ورسوي.
په ورته مهال، د بلخ ابو عليسینا بلخي حوزوي روغتون امر محمداشرف روان په دغه ناسته کې د عامې روغتیا له وزیر سره ځیني ستونزې شریکې کړې.
هغه زیاته کړه، د ابو عليسینا بلخي حوزوي روغتون چې دا مهال زر بستره لري، هره ورځ له ۴ زره څخه تر ۶ زره ناروغان ورته مراجعه کوي، خو دغه روغتون د روغتیایي تجهیزاتو له کمښت سره مخ دی.
ډاکټر روان همداراز د درملو، روغتیایي پرسونل او متخصص ټرینرانو کمښت، د ډاکټرانو د علمي رتبو ځنډېدل او د پرسونل د معاشونو کموالی د دغه روغتون له اساسي ستونزو یادې کړې.
ده زياته کړه، د ابو عليسینا بلخي حوزوي روغتون یوې اساسي بیارغونې ته اړتیا لري او د عامې روغتیا له سرپرست وزیر څخه یې غوښتنه وکړه څو یادې ستونزې حل کړي.
د ناستې په پای کې د عامې روغتیا سرپرست وزیر دوی ته د دغو ستونزو د حل ډاډ ورکړ.
GET IN TOUCH
NEWSLETTER
SUGGEST A STORY
PAJHWOK MOBILE APP