امریکا: په عراق کې مو د ایران پلوه وسله‌والې ډلې قوماندان وژلی

[restrict paid="true"]

اټلانټا (پژواک، ۱۸ سلواغه ۱۴۰۲): د امریکا د وسله‌والو ځواکونو مرکزي قوماندانۍ ویلي چې عراق کې یې د هوایي برید په پایله کې د ایران پلوه ډلې کتایب حزب‌الله قوماندان وژلی دی.

امریکایي ځواکونو له دې مخکې اعلان کړی چې دغه ډله په عراق کې د امریکا پر پوځي اډو او ځواکونو بریدونو کې لاس درلود.

د امریکا د وسله‌والو ځواکونو مرکزي قوماندانۍ د سلواغې په ۱۸مه، په یوه خبرپاڼه کې ویلي، دا برید د درېیو امریکايي عسکرو د وژلو غچ اخیستل دي.

څو ورځې مخکې په اردن کې د امریکا پر یوې پوځي اډې د بې‌پیلوټه الوتکې برید کې درې امریکایي سرتېري ووژل شول او ۴۰ نور ژوبل شوي وو.

امریکایي ځواکونو ویلي چې په دغه برید کې د ولسي تلفاتو هیڅ نښه نه لیدل کېږي.

په ټولنیزو رسنیو کې په خپرې شوې ویدیو کې لیدل کېږي چې د بغداد په لویه لارې کې یو موټر په لمبو کې سوځي.

د امریکايي ځواکونو په اعلامیې کې راغلي چې د خپلو خلکو د ساتلو لپاره به په مسلسل ډول لازم اقدامات کوي او له هغو خلکو سره به حساب کوي چې د امریکايي ځواکونو خوندیتوب ګواښي.

د امریکا په مشرۍ د ایتلاف ځواکونه وايي چې د اکتوبر له میاشتې راهیسې په عراق او سوریه کې یې پر ځوااکونو ۱۶۵ بریدونه شوي ‌چې ۶۶ په عراق، ۹۸ یې په سوریې او نور یې په اردن کې شوي دي. په عراق کې د «مقاومت ډلې» د اکثریت بریدونو مسئوولیت منلی دی.

[/restrict]