ماليې وزارت: له پاکستانه قاچاقي راوړل‌کېدونکي ۵۶ ټنه بېلابېل توکي نیول شوي

کابل (پژواک، ۲۳ سلواغه ۱۴۰۲): د ماليې وزارت وايي، د دغه وزارت کارکوونکو له پاکستانه په قاچاقي توګه د نږدې ۵۶ ټنه بېلابېلو توکو د راوړلو او هغه هېواد ته د ۶۵نیم ټنه زړې اوسپنې د قاچاق مخه نيولې ده.

ماليې وزارت پر خپله اېکس‌پاڼه ليکلي، تېره اونۍ د کندهار، نيمروز او هلمند ولایتونو د ګمرکونو ریاست د ګرځنده څارنې کارکوونکو هغه توکي ترلاسه کړي چې په قاچاقي توګه له پاکستانه را وړل شوي وو.

سرچينې لیکلي، په ترلاسه شوو توکو کې لس عرادې موټرسایلکونه، ۳۵ ټنه مالټې، ۱۲.۲ ټنه شیریني‌باب، څلور ټنه دال، ۲/۲ ټنه یوناني درمل، ۱/۱۷ ټنه طبي درمل، څه باندې ۱.۱۵ ټنه ټوکر، ۱۲۰ کيلوګرامه کرنیز درمل او ۲۶۰ کارټنه اچار شامل دي.

یاد وزارت دغه راز لیکلي چې ۶۵نیم ټنه هغه زړه اوسپنه یې هم ترلاسه کړې چې په قاچاقي توګه پاکستان ته انتقال کېده.

د مالیې وزارت د ترلاسه شوو توکو د قاچاق په تور د چا د نیولو خبره نه ده کړې