<p style="text-align: justify;">مزارشریف (پژواک، ۲۵ سلواغه ۱۴۰۲): د مزارشریف ښاروالۍ مسوولین وایي چې د ملګرو ملتونو د خدمتونو برابرولو ادارې (UNOPS) دفتر په مالي ملاتړ یې د دغه ښار یو شمېر ناحیو کې ۱۵ زره کسانو ته کاري فرصتونه برابر کړي دي.</p>
<p style="text-align: justify;">د مزارشریف ښاروال محمدکاظم طارق وایي چې یونپس ادارې له ښاروالۍ سره په همغږۍ د دغه ښار ۱۲ ناحیو کې ۱۵ زره کسانو ته لنډمهال کارونه پیدا کړي دي.</p>
<p style="text-align: justify;">د هغه په وینا، یاده اداره په مزارشریف ښار کې خلکو ته د کار زمینې برابرولو په موخه د ویالو ایستلو، سړکونو، پلیو لارو جوړولو او نورو برخو کې یو شمېر لنډمهاله پروژې پلې کوي.</p>
<p style="text-align: justify;">د مزار ښار اوومه ناحیه کې کارته اماني هغه سیمه چې د سړک جوړولو پروژه په کې عملي کېږي.</p>
<p style="text-align: justify;">د دې پروژې انجینر محمدشفیع شېراني وویل، په دې سیمه کې د سړک جوړولو پروژه پلې کېږي چې شاوخوا ۳۰۰ کسان په کې کار کوي او هر کس ته د ورځنې ۴۵۰ افغانۍ مزدوري ورکول کېږي.</p>
<p style="text-align: justify;">بلخوا په دغو پروژو کې بوخت کسان هم خوښ دي چې د کار زمینه ورته برابره شوې ده.</p>
<p style="text-align: justify;">د پادشاهمیر په نوم یو کارګر وایي: «خوشاله یم په خپله سیمه کې راته د کار کولو فرصت برابر شوی، له یوې خوا کورنۍ ته مې حلاله نفقه ګټم، له بلې خوا مې خپله سیمه او وطن جوړېږي.»</p>
<p style="text-align: justify;">هغه له نورو موسسو او سازمانونو غوښتنه کوي چې خلکو ته دې د وړیا خوراکي توکو پر ځای کاري فرصتونه برابر کړي.</p>
<p style="text-align: justify;">دغه راز یو بل کارګر خیبر هم وایي، خوښ دی چې د بلخ په کچه دغه ډول پروژې پلې کېږي؛ ځکه له یوې خوا سیمه ابادېږي او له بلې خوا ځایي اوسېدونکو ته په کې کاري فرصتونه برابرېږي.</p>
<p style="text-align: justify;">دا په داسې حال کې ده چې له دې مخکې هم یوې موسسې په بلخ کې له پاکستانه راستنېدونکو سلګونو کسانو ته کاري فرصتونه برابر کړي وو.</p>
