<p style="text-align: justify;">[restrict paid="true"]</p>
<p style="text-align: justify;">اټلانټا (پژواک، ۳۰ سلواغه ۱۴۰۲): د ملګرو ملتونو سرمنشي انټوني ګوټریش وایي چې د دوحې کنفرانس ګډونوال د افغانستان لپاره د ځانګړي استازي له ټاکل کېدو سره موافق وو خو پر دې موضوع به لا نورې سلا مشورې وشي.</p>
<p style="text-align: justify;">د ملګرو ملتونو عمومي منشي انټوني ګوټريش دا څرګندونې د دوشنبې ورځ (د سلواغې ۳۰مه) د قطر په پلازمېنه دوحه کې د افغانستان په اړه له دوه ورځنۍ غونډې وروسته په یوه خبري کنفرانس کې وکړې.</p>
<p style="text-align: justify;">یاده غونډه کې چې د ملګرو ملتونو تر سرپرستۍ لاندې جوړه شوې وه، د شاوخوا ۲۸ هېوادونو استازو او د افغانستان د مدني ټولنې څلورو غړو برخه اخیستې وه خو د افغانستان سرپرست حکومت - سره له دې چې بلنه ورکړل شوې وه- په وروستیو شېبو کې وویل چې په دې غونډه کې ګډون نه کوي.</p>
<p style="text-align: justify;">د ملګرو ملتونو سرمنشي دغه کنفرانس ګټور وباله او ویې ویل چې ګډونوالو په کې د افغانستان په تړاو مهمې خبرې او بحثونه وکړل.</p>
<p style="text-align: justify;">هغه زیاته کړه، د افغانستان سرپرست حکومت ته یې بلنه ورکړې وه چې غونډې ته ورشي، خو هغوی یې بلنه ونه منله؛ ګوټریش هیله وښوده چې د هغوی استازي په راتلونکي کې په دا ډول نورو غونډو کې ګډون وکړي.</p>
<p style="text-align: justify;">ګوټریش وویل، د افغانستان سرپرست حکومت په دې غونډې کې د ګډون لپاره یو لړ شرایط ټاکلي وو چې په وینا یې، ملګرو ملتونو ته د منلو نه وو.</p>
<p style="text-align: justify;">هغه دغه راز وايي، د هغوی یو شرط دا و چې د افغانستان له نورو استازو سره به په دې غونډه کې خبرې نه کېږي.<img class="alignleft wp-image-597018 " src="https://pajhwok.com/wp-content/uploads/2024/02/GGpHz36W0AIWF2B-1024x676.jpg" alt="" width="467" height="308" /></p>
<p style="text-align: justify;">راپورونه وايي چې د کابل شرطونه دا هم وو چې د دوحې په غونډه کې به د افغانستان لپاره د ځانګړي استازي ګومارل کېدو په اړه بحث نه کېږي، په غونډه کې دې کابل د افغانستان د استازي په توګه ومنل شي او کابل پلاوی به د ملګرو ملتونو له عمومي منشي سره ملاقات کوي.</p>
<p style="text-align: justify;">د ملګرو ملتونو عمومي منشي وویل، کنفرانس کې د افغانستان د سرپرست حکومت نه ګډون غونډې ته هیڅ زیان ونه رساوه.</p>
<p style="text-align: justify;">نوموړي د دوحې غونډې د هدف په اړه وویل: «موږ د یو سولهییز افغانستان غوښتونکي یو، داسې افغانستان چې هم له ځان او له خپلو ګاونډيانو سره په سوله کې وي او د یوه ملي حاکمیت لرونکي هېواد په توګه د خپلو نړۍوالو ژمنو عملي کولو توان ولري.»</p>
<p style="text-align: justify;">ده زیاته کړه: «افغانستان باید د اورپکو مرکز نه شي، د ښځو او نجونو حقونو ته په کې درناوی وشي او داسې حکومت په کې وي چې ټول قومونه په کې برخه ولري.»</p>
<p style="text-align: justify;">ګوټریش وایي، نړۍوالو مکلفیتونو ته پابندي، له ګاونډیانو او نړۍوالو سره د سرپرست حکومت د اړیکو په ټینګولو او د افغانانو حقونو ته په درناوي سره به هغوی د نړۍوالې ټولنې سیاسي او اقتصادي میکانیزمونو کې ورګډ شي.</p>
<p style="text-align: justify;">هغه زیاته کړه چې دغه هدف ته د رسېدو لپاره ګډونوال د ملګرو ملتونو د ځانګړي مفتش له ارزونو سره موافق وو چې یو وړاندیز یې د افغانستان لپاره د ملګرو ملتونو د ځانګړي استازي ګومارل دي.</p>
<p style="text-align: justify;">د ملګرو ملتونو سرمنشي وویل چې د یوه ځانګړي استازي ګومارلو په اړه سلا مشورې پیلوي چې د افغانستان سرپرست حکومت او نړۍوالې ټولنې ترمنځ چارې تنظیم کړي.</p>
<p style="text-align: justify;">د ځینو سرچینو په وینا، ټاکل شوې د افغانستان لپاره د ملګرو ملتونو ځانګړی استازی د روانې میلادي میاشتې په وروستیو کې د ملګرو ملتونو امنیت شورا په ناسته کې وګومارل شي.</p>
<p style="text-align: justify;">ویل کېږي چې چین، روسیه او ایران د افغانستان لپاره د ملګرو ملتونو د ځانګړي استازي له ټاکل کېدو سره موافقه نه ده کړې.</p>
<p style="text-align: justify;">د ملګرو ملتونو عمومي منشي د افغانستان د ګاونډیانو په ګډون له ځینو مشخصو هېوادونو د اړیکو د یوې ډلې جوړولو طرحې په اړه هم وغږېد، ويې ویل چې له کابل سره په تعامل کې نوره همغږي هم وشي خو هغه زیاته کړه چې د تماس ډلې جوړول د هغه شخصي نظر دی.</p>
<p style="text-align: justify;">ګوټریش وویل، روسیې غوښتي وو چې د دوحې غونډه کې د افغانستان د مدني ټولنې له استازو سره لیده کاته ونه شي.</p>
<p style="text-align: justify;">خو هغه زیاته کړه: «زه له دغه وړاندیز سره بېخي مخالف یم؛ له طالب مقاماتو سره ملاقاتونه مهم دي، خو فکر کوم دا هم ډېر مهم دي چې په افغانستان کې د نورو خلکو خبرې هم واورېدل شي.»</p>
<p style="text-align: justify;">د افغانستان د مدني ټولنو په استازیتوب خبریال لطفالله نجفيزاده، د ولسي جرګې پخوانۍ غړې شاهګل رضايي، د ښځو د حقونو فعاله محبوبه سراج او د بشري حقونو فعاله میترا مهران د دوحې غونډې ته بلل شوي وو.</p>
<p style="text-align: justify;">په دوحه کې افغان ژورنالېست سمیع یوسفزی وایي، دا کنفرانس په دې مهم و چې د افغانستان په اړه جوړ شو او نړۍوالو پرې خبرې وکړې.</p>
<p style="text-align: justify;">خو هغه له پژواک سره خبرو کې وویل چې د افغانستان له سرپرست حکومت سره د نړۍوالو پر تعامل د یو شمېر هېوادونو ترمنځ اختلافات رابرسېره شول.</p>
<p style="text-align: justify;">ده زیاته کړه، چین، ایران او روسیه نه غواړي چې له اسلامي امارت سره دې نړۍوال په سختۍ سره برخورد وکړي، خو ځینې نور غربي هېوادونه بیا سختي غواړي.</p>
<p style="text-align: justify;">د یوسفزي په وینا، افغانستان لپاره د ملګرو ملتونو د بل ځانګړي استازي پر ټاکل کېدو هم د یو شمېر هېوادونو ترمنځ اختلافات شته؛ روسیه، چین او ایران نه غواړي چې بل استازی وټاکي، په داسې حال کې چې د افغانستان سرپرست حکومت هم د نوي استازي له ټاکل کېدو سره مخالف دی.</p>
<p style="text-align: justify;">[/restrict]</p>
