اروزګان کې د صنعتي پارک لپاره ۷۰۰۰ جریب ځمکه ځانګړې شوه

ترینکوټ (پژواک، ۸ کب ۱۴۰۲): اروزګان کې چارواکي وايي، د دغه ولایت په مرکز ترینکوټ ښار کې د صنعتي پارک لپاره اوه زره جریبه ځمکه ځانګړې شوې ده.

د اروزګان والي مولوي محمد علي‌جان احمد په ترینکوټ ښار کې صنعتي پارک لپاره د ځمکې ځانګړې کېدو په موخه جوړې شوې غونډې ته وویل، دغه ولایت کې د سوداګریزو فعالیتونو لپاره د اسلامي امارت له لوري صنعتي پارکونه په پام کې نیول شوي دي.

هغه زیاته کړه، د ترینکوټ ښار اړوند چنارک سیمه کې یې صنعتي پارک ته اوه زره جریبه ځمکه ځانګړې کړې چې په پانګوالو به ووېشل شي.

نوموړي وویل، د کورنیو تولیداتو د ودې او اقتصادي پرمختګ په موخه یې هڅې چټکې کړې دي.

د هغه په خبره، د اسلامي امارت له راتګ سره سم د نورو هېوادوالو په څېر د پانګوالو سر او مال هم خوندې شوی او په بېلابېلو برخو کې یې د پانګوني لپاره زمینه برابره شوې ده.

ورته مهال د اروزګان د سوداګرۍ او صنایعو خونې رییس محمد داوود شاهین له پانګوالو وغوښتل چې دغه ولایت کې پانګونه وکړي او خلکو ته کاري فرصتونه برابر کړي.

په همدې حال کې د دغه ولایت سوداګر خوښ دي چې په لومړي ځل ورته د صنعتي پارک په موخه ځمکې ورکول کېږي.