د جاپان سفیر له افغانستان سره د خپل هېواد د مرستو پر دوام ټینګار وکړ

جلال‌اباد (پژواک، ۹ کب ۱۴۰۲): په افغانستان کې د جاپان سفير ننګرهار ته د سفر پر مهال د دغه ولايت له چارواکو سره ليدلي او د کرنې او نورو برخو کې يې د خپلو مرستو د دوام ډاډ ورکړی دی.

د ننګرهار ولايت مقام رسنيو دفتر له لوري پژواک خبري اژانس ته رالېږل شوې خبرپاڼه کې راغلي چې د جاپان له سفير کوروميا تاکايوشي سره په دغه سفر کې په افغانستان کې د روغتيا نړۍوال سازمان مشر ډاکټر مانول تورېس دي لارا هم ملتيا کوله.

د سرچينې په وينا، د ننګرهار والي ملا محمدنعيم اخند د جاپان او افغانستان د تاريخي او دوستانه اړيکو په اړه خبرې وکړې ویې وویل چې په ننګرهار کې يې اړينې او با کيفيته پروژې پلې کړې او لا هم کار کوي.

نوموړي د جاپان سفير او کار کوونکو ته د بشپړ امن او خونديتوب ډاډ ورکړ همدا راز يې وويل، چې کولای شي چې د دغه ولايت هرې سيمې ته هر مهال ولاړ شي او په ټولو قانوني چارو کې يې د تېر په څېر د همکارۍ او همغږۍ ډاډ ورکړ.

د جاپان سفیر کوروميا تاکايوشي د دې ليدنې پر مهال وويل، د تاريخ په اوږدو کې جاپان او افغانستان ښې اړيکې درلودې او همدا لامل و چې له تېر نظام وروسته یې له ا.ا سره هم خپله همکاري عادي او دوامداره ساتلې ده.

هغه په دغه ولايت کې د جاپان د سولې او روغتيا موسسې د مشر ډاکټر تیتڅو ناکامورا فعاليتونو ته په اشاره وويل چې ننګرهار د جاپان لپاره ځانګړی اهميت لري او خپلې همکارۍ ته دوام ورکوي.

هغه دغه راز وويل، ننګرهار د کرنې له پلوه ډېر اهميت لري او دوی هڅه کوي چې په دغه ولایت کې د کرنې برخه کې نورې پروژې هم تطبیق کړي او د ډاکتر ناکامورا پلانونه او هيلې پوره کړي.

د جاپان سفير دغه وویل چې په نږدې وخت کې په استانبول کې يوې غونډه کې ګډون کوي چې د افغانستان، په ځانګړي ډول د ننګرهار د اړتياوو په اړه به وړانديزونه شریک کړي.

په افغانستان کې د روغتيا نړۍوال سازمان مشر ډاکټر مانول توريس دیلارا هم په خپلو خبرو کې دغه په ولايت کې د روغتيا برخه کې د خپلو مرستو د دوام او پراختيا ډاډ ورکړ.

ټاکل شوې د جاپان سفير به د خپل دغه سفر پر مهال له هغو ځايونو هم ليدنه وکړي چې د جاپان د سولې او روغتيا موسسې له خوا جوړ شوي دي.