خوستښار (پژواک، ۱۳ کب ۱۴۰۲): د خوست حکومتي مسوولين وايي چې د دغه ولايت د نفت او ګازو مديريت څو کارکوونکي او د تېلو پمپونو يو شمېر مالکان د مالي فساد په تور نيول شوي دي.
د خوست د نفت او ګازو مديريت عملياتي مدير احسانالله پژواک خبري اژانس ته وويل چې د دوی یو شمېر کارکوونکي او د تېلو پمپونو ځیني مالکان د دغه ولايت د امنيتي او کشفي ارګانونو له خوا د مالي فساد په تړاو نيول شوي دي.
هغه وويل، د دوی څو کارکوونکو په غير رسمي وخت کې د تېلو يو شمېر پمپونو له مالکانو سره د بډو اخيستو په بدل کې د تېلو د پلور ورځنۍ اندازه کموله چې ونیول شول.
د هغه په وينا، په دې کار سره د پمپونو څښتنانو د مالياتو له ورکولو تېښته کوله چې ملي عوايدو ته يې ميليونونه افغانۍ زيان رساوه.
نوموړي د نیول شوو کسانو د شمېر او نورو جزئیاتو له ورکولو ډډه وکړه.
Views: 126
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن