کابل (پژواک، ۲۲ کب ۱۴۰۲): د اوبو او برېښنا وزارت دوو راتلونکو ورځو کې نسبتاً د سختو واورو او بارارنونو ورېدو، د سېلابونو راوتلو او د هېواد په ځينو سیندیزو حوزو کې د سیندونو اوبو کچې لوړېدو خبر ورکړی دی.
دغه وزارت نن په یوه خبرپاڼه کې لیکلي چې د روانې کب میاشتې په ۲۳مه او ۲۴مه د هېواد د سیندیزو حوزو ځینو سیمو کې د سېلابونو راوتلو او په سیندونو کې د اوبو ډېرېدو احتمال شته دی.
د دغه وزارت د خبرپانې له مخې، «د شمال هریرود او هلمند» سیندیزو حوزو کې نسبتاً د سختو واورو ورېدو او سېلابونو راوتلو او د بدخشان، تالقان، بغلان، سمنګان، بلخ، سرپل، میمنه، پنجشېر، غوربند، میدانوردګ، کابل، کونړ، ارغنداب او ترنک په سیندونو کې د واورو ویلي کېدو او بارانونو له امله د اوبو ډېرېدو اټکل شوی دی.
سرچینې د یادو سیمو له اوسېدونکو غوښتي چې د سېلابونو او اوبو پورته کېدو پرمهال د سیندونو غاړو ته له نږدې کېدو ډډه وکړي او د سېلابونو راوتلو او د اوبو ډېرېدو پر مهال دې لاندې سیمو ته خبر ورکړي څو له انساني تلفاتو مخنیوی وشي.
