غزني کې د ترافیکي پېښې له امله دوه کسان مړه شوي

غزني ښار (پژواک، ۲۲ کب ۱۴۰۲): د غزني امنیه قومانداني وایي، د دغه ولایت په لومړۍ امنیتي حوزې سیمه کې د ترافیکي پېښې له امله دوه کسان مړه شوي او یو بل ټپي دی.

د غزني امنیې قوماندانۍ ویاند ابوخالد سرحدي پژواک خبري اژانس ته وویل چې نن غرمه مهال د غزني ښار اړوند روضې کوتل سیمه کې یو مازدا موټر له یوه رینجر سره ټکر کړی دی.

د هغه د معلوماتو له مخې، په دې پېښه کې دوو امنیتي کسانو ژوند له لاسه ورکړی او یو بل ټپي شوی دی.

نوموړی وایي چې ټپي شوی کس د غزني ملکي روغتون ته لېږدول شوی دی.