فیضاباد (پژواک، ۶ غبرګولی ۱۴۰۴): بدخشان کې ځايي مسوولین وايي چې تېره شپه د دغه ولایت د مرکز په مربوطاتو کې د سخت باران او سېلاب راتلو له امله د یوې کورنۍ ۱۰ غړي مړه شوي دي.
د بدخشان طبیعي پېښو ته د رسېدو ادارې رییس مولوي محمداکرم اکبري وايي چې تېره شپه د دغه ولايت د مرکز اړوند په مورچک کلي کې د سخت باران او سېلاب راتلو له امله د يوې کورنۍ لس غړي مړه شوي دي.
اکبري زیاتوي، تر د دې کورنۍ یوازې د یوه غړي مړی په کوکچې سیند کې موندل شوی، د دې ادارې د پلټنې یوه ډله له یوې موسسې سره په همغږۍ د پاتې کسانو د جسدونو په لټه کې ده.
د بدخشان پېښو ته د رسېدو ادارې رییس وویل، د یادې کورنۍ مړه شوي کسان له مور او پلار پرته نور ټول ماشومان دي.
د مسوولینو په وینا، د تېرې شپې سخت باران له امله چې څو ساعته یې دوام وکړ، د دغه ولايت د مرکز اړوند په مورچک، پس جر، جاني درې او چتراق کليو او ارګو ولسوالۍ کې سخت سېلابونه راوتلي چې خلکو ته یې د ځاني تلفاتو ترڅنګ مالي زيانونه هم اړولي دي.
