<p style="text-align: justify;">زابل (پژواک، ۸ غبرګولی ۱۴۰۲): د زابل په شاجوی ولسوالۍ کې د یوې ترافیکي پېښې له امله د مخکني ولسمشر محمداشرف غني د مرستیال ویاند دواخان مینهپال ورور نورالله مینهپال ژوند بایللی دی.</p>
<p style="text-align: justify;"> د نورالله مینهپال مشر ورور عبدالله مینهپال پر خپله فېسبوکپاڼه لیکلي چې ورور یې پرون مازدیګر (دوشنبې د غبرګولي ۷مه) د زابل په شاجوی ولسوالۍ کې د یوې ترافیکي پېښې پر مهال مړ شوی دی.</p>
<p style="text-align: justify;">هغه زیاته کړې، پېښه قصدي نه وه او موټر چلوونکی هم نیول شوی، خو د دوی کورنۍ سر له اوسه هغه ته بښنه کړې ده.</p>
<p style="text-align: justify;">عبدالله مینهپال پر ټولنیزو رسنیو هغه اوازې رد کړې چې ګواکي نورالله مینهپال وژل شوی او یا په قصدي ډول په موټر وهل شوی دی.</p>
<p style="text-align: justify;">د زابل ولایت د مقام ویاند صدیقالله وثیق هم وايي، نورالله مینهپال پرون د دوشنبې ماذیګر شاوخوا شپږ بجې له خپل باغه د کور پر لور روان و چې موټرسایکل یې د شاجوی ولسوالۍ پر عمومي سړک له یوه موټر سره لګېدلی دی.</p>
<p style="text-align: justify;"> د هغه په وینا، د دې پېښي په تړاو موټر چلوونکی نیول شوی.</p>
<p style="text-align: justify;">شل کلن نورالله مینهپال دا مهال کومه رسمي دنده نه لرله او په راتلونکې اونۍ کې ورته د کوژدې کولو لپاره تیاری نیول شوی و.</p>
