<p style="text-align: justify;">کابل (پژواک، ۲۱ غبرګولی ۱۴۰۳): عدلیې وزارت وايي، له دغه وزارت سره ثبت شوو خیریه بنسټونو د بغلان او تخار له سېلابځپلو سره ۵۶ میلیون افغانۍ مرسته کړې ده.</p>
<p style="text-align: justify;">د عدلیې وزارت ویاند قاري برکتالله رسولي پر <strong><a href="https://x.com/BarakatRasuli/status/1799745508073681322">اېکسپاڼه</a> </strong>یوه پیغام کې لیکلي چې دغو بنسټونو په یادو ولایتونو کې له سېلابځپلو سره ۵۶ میلیون ۱۳۲ زره او ۸۲ افغانۍ مرسته کړې ده.</p>
<p style="text-align: justify;">هغه څرګنده کړې چې تر دې مخکې عدلیې وزارت له ثبت شوو ټولنو او مرستندیو بنسټونو غوښتي وو څو تخار او بغلان ولایتونو کې له سېلابځپلو سره مرسته وکړي.</p>
<p style="text-align: justify;">له دې مخکې د خوړو نړۍوال پروګرام هم ویلي وو چې افغانستان کې یې له نږدې ۲۰زره سېلابځپلو سره د خوراکي توکو مرسته کړې ده.</p>
