اروزګان کې د یوه ماشوم له سترګو د ژړا پر مهال د اوښکو پر ځای وینه بهېږي

ترینکوټ (پژواک، ۷ چنګاښ ۱۴۰۳): د اروزګان د عامې روغتیا رییس وايي چې په دغه ولایت کې د یوه ماشوم له سترګو د ژړا پر مهال د اوښکو پر ځای وینه بهېږي.

د اروزګان عامې روغتیا رييس ډاکټر محمدالله روحاني پژواک ته وویل چې د دغه ولایت د چورې ولسوالۍ په سراب سیمه کې یو ماشوم پر یوې نامعلومې ناروغۍ اخته شوی دی.

هغه وايي چې له څه مودې راهیسې د دغه ماشوم له سترګو د ژړا پر مهال د اوښکو پر ځای وینه راځي او له پوزې يې هم وینه بهېږي.

ده زیاته کړه: «د ترینکوټ په ولایتي روغتون کې د لومړنیو معایناتو پایله کې کومه ناروغي تشخیص نه شوه او نه هم د وینې د کمېدو ستونزه تشخیص شوه، اوس دغه ماشوم د کندهار میرویس روغتون ته انتقال شوی دی.»

د حیدر په نوم د دغه ماشوم پلار سیف‌الله پژواک ته وویل، یو کلن زوی یې له تېرو اتو میاشتو راهیسې پر یاده ناروغۍ اخته شوی دی.

هغه زیاته کړه، د ژړا پر مهال د حیدر له سترګو او پوزې وینه بهېږي.

ده وویل چې لومړی یې خپل زوی د اروزګان ولایتي روغتون او بیا له هغه ځایه د کندهار میرویس روغتون ته انتقال کړی دی.

نوموړي غوښتنه وکړه چې اړوند مسوولین دې د ده د زوی د دغې ناروغۍ درملنې برخه کې پوره همکاري وکړي.

د یادونې ده چې د لومړي ځل لپاره په اروزګان ولایت کې دا ډول یوه روغتیایي ستونزه تر سترګو کېږي.