مهترلام، میدانښار (پژواک، ۱۲ چنګاښ ۱۴۰۳): د کابل - جلالاباد پر لویه لار د لغمان قرغیو ولسوالۍ مربوطاتو کې د دوو جلا ترافیکي پېښو له امله ۱۲ کسان ټپیان شوي او د میدانوردګو په سیداباد ولسوالي کې یو ماشوم موټرسایکل وهلی او مړ شوی دی.
د لغمان امنیې قوماندانۍ ویاند یونس یوسفزي پژواک خبري اژانس ته وویل، نن غرمه مهال د کابل - جلالاباد پر لویه لار د قرغیو ولسوالۍ اړوند په کاکڅ سیمه کې د دوو کرولا موټرو د ټکر له امله د دوو ښځو په ګډون ۷ کسان ټپيان شوي دي.
هغه زیاته کړه، دغه راز د یادې ولسوالۍ په مشهخېلو سيمه کې نن له غرمې مخکې یوه کرولا موټر او ريکشې ترمنځ ټکر شوی چې له امله یې پنځه کسان ټپيان شوي دي.
نوموړي وویل، د یادو پېښو ټپیان د درملنې په موخه د ننګرهار حوزوي روغتون ته لېږدول شوي دي.
بلخوا، د میدانوردګو ولایت د سیداباد ولسوالۍ په جویزرین سیمه کې د ترافیکي پېښې له امله یو ماشوم مړ شوی دی.
د سیمې یوه اوسېدونکي حمدالله پژواک خبري اژانس ته وویل، یاد ماشوم ۱۱ کاله عمر درلود چې له سړک د تېرېدو پر مهال موټرسایکل وهلی دی.
