<p style="text-align: justify;">کابل (پژواک، ۱۴ زمری ۱۴۰۳): د راپورونو له مخې، د لبنان حزبالله د اسرائیل په شمال کې د اصبعالجلیل پر لور لږ تر لږه ۵۰ توغندي توغولي دي.</p>
<p style="text-align: justify;">اسکای نیوز راپور ورکړی چې دغه توغندي نن سهار (یکشنبه) د لبنان له لوري توغول شوي دي.</p>
<p style="text-align: justify;">د راپور له مخې، د اسرائیل دفاعي سیستمونه هم د یادو بریدونو په غبرګون کې فعال شوي دي.</p>
<p style="text-align: justify;">ورته مهال، راپور کې راغلي چې حزبالله په یوې بیانیه کې د یاد توغندیز برید مسوولیت اخیستی او څرګنده کړې یې ده چې دغه برید د دوی د ارشد قوماندان د «ترور» غبرګون کې نه و.</p>
<p style="text-align: justify;">د لبنان حزبالله زیاته کړې، یاد توغندي د اسرائیلو د بریدونو په ځواب کې توغول شوي چې د لبنان د سوېل په دوو کلیو کې یې ملکي وګړي په نښه کړي وو.</p>
<p style="text-align: justify;">دا په داسې حال کې ده چې د راپورونو له مخې، تهران کې په یوه برید کې د اسماعیل هنیه له وژل کېدو او په منځنۍ اسیا کې د احتمالي جګړې له ویرې نړۍوالو هوایي شرکتونو لکه یونایټیډ، دلتا، بریټیش ایرویز، سویس، لوفت هانزا، ایر انډیا او فلای دوبۍ لبنان او اسرائیل ته خپلې الوتنې وځنډولې.</p>
