کابل (پژواک) – د جرمني لومړی وزیر فریډریش مرتس وایي، تمه لري چې د روسیې او اوکراین ترمنځ د سولې نوي مذاکرات به ډېر ژر ترسره شي او اروپا به هم د امریکا ترڅنګ په دغو خبرو کې ګډون ولري.
د امریکا، روسیې او اوکراین د استازو ترمنځ د درېاړخیزو مذاکراتو لومړی پړاو د روان کال د لړم په ۱۹مه د اوکراین د جګړې د پای ته رسولو په موخه د متحده عربي اماراتو په پلازمېنه ابوظبۍ کې ترسره شوی و.
د فرانسپرېس خبري اژانس د راپور له مخې، مرتس تېره ورځ (پنجشنبه) د جرمني په پلازمېنه برلین کې د «داوطلبو هېوادونو د ائتلاف» په غونډه کې ویلي چې تر اوسه د دغو مذاکراتو د دویم پړاو لپاره مشخصه نېټه نه ده ټاکل شوې او ښکېلې خواوې یې د کوربهتوب لپاره د یوه بېطرفه ځای په لټه کې دي.
نوموړي متحده عربي امارات د دغو مذاکراتو د ترسره کېدو لپاره یو له احتمالي ځایونو بللی دی.
مرتس په یاده غونډه کې، چې د اوکراین ولسمشر ولادیمیر زېلېنسکي او د بېلابېلو هېوادونو څه باندې ۲۵ مشرانو پکې ګډون کړی و، زیاته کړې چې د دغه ائتلاف غړي هېوادونه له روسیې سره د نویو مذاکراتو د پیل لپاره د امریکا د هڅو هرکلی کوي.
هغه هیله څرګنده کړې چې په دغه بهیر کې به د اوکراین، امریکا او اروپا ترمنځ ګډه همکاري رامنځته شي.
په همدې حال کې، د بریتانیا لومړي وزیر انډي برنهام هم په دې غونډه کې ویلي چې د اوکراین ملاتړي هېوادونه به تر هغه وخته د دغه هېواد ترڅنګ ولاړ وي چې اړتیا ورته وي او خپل ملاتړ به نه بندوي.
بلخوا، د امریکا ځانګړي استازي جېرډ کوشنر، چې د برلین په غونډه کې یې ګډون درلود، ویلي چې ډونالډ ټرمپ د اوکراین د سولې په هوکړه کې د اروپا ګډون غواړي او په دې برخه کې د امریکا او اروپا دریځونه یو بل ته نږدې شوي دي.
نوموړي څرګنده کړې چې ټرمپ غواړي د اروپا په ملتیا یوې هوکړې ته ورسېږي او نه غواړي پر دغو هېوادونو په یو اړخیز ډول کوم څه وتپي.









