منځپانګې ته تلل
جمعه ۲۰ نومبر ۲۰۲۶ · کابل ۱۲:۴۸ غ.م
۵°نیمه ورېځ · ↑۱۵° ↓۳°د هوا کیفیت: منځنی

د حوثیانو په برید کې د ریاض تر ټولو لوړه ودانۍ زیانمنه شوې

· ۲ دقیقې لوستل · ۰ کتنې
د سعودي په ریاض کې د عامه پانګونې صندوق (PIF) د مرکزي دفتر ودانۍ په برید کې زیانمنه شوې. (انځور: SPA)

کابل (پژواک) – رویټرز خبري اژانس راپور ورکړی چې د سعودي عربستان په پلازمېنه ریاض کې د عامه پانګه‌ونې صندوق مرکزي دفتر چې په تر ټولو لوړه ودانۍ کې موقعیت لري، د حوثیانو په توغندیز برید کې زیانمن شوی دی.

 د راپور له مخې، د سعودي عربستان ملکي دفاع ادارې ویلي چې د ریاض په مالي مرکز کې د حوثیانو په برید کې د یوې ودانۍ څو پوړونه او نږدې ودانۍ زیانمنې شوې دي.

په راپور کې راغلي چې د سعودي دولتي خبري اژانس (SPA) له خوا خپور شوی انځور ښيي چې په نښه شوې ودانۍ د دغه هېواد د عامه پانګونې صندوق (PIF) مرکزي دفتر دی. د برید له امله د ودانۍ د اوو یا اتو پوړونو کړکۍ ماتې شوې او د فلزي نما ځینې برخې یې هم زیانمنې شوې دي.

حوثیانو ویلي چې د پنجشنبې په ورځ یې د ریاض مالي مرکز دوه ځله، یو ځل سهار وختي او بل ځل ماښام، په نښه کړی دی.

د سعودي په مشرۍ ائتلاف ویلي چې د ریاض پر لور یې د توغول شوی توغندی شنډ کړی دی. خو رویټرز د درېیو باخبره سرچینو په حواله راپور ورکړی چې د عامه پانګونې صندوق ودانۍ د حوثیانو د توغول شوي توغندي له امله زیانمنه شوې ده.

د راپور له مخې، دا په دوو اونیو کې دویم ځل دی چې د ریاض په مالي مرکز کې یوه مهمه ودانۍ د حوثیانو په برید کې زیانمنېږي؛ تر دې مخکې د نومبر په اتمه د سعودي د دولتي تېلو شرکت ارامکو ودانۍ هم په برید کې زیانمنه شوې وه.

د رویټرز د راپور له مخې، د یمن جګړه د روان کال په جولای کې د امریکا او ایران ترمنځ د جګړې له پیل سره بېرته توده شوې او هممهاله حوثیانو د سعودي پر هوايي ډګرونو او د تېلو پر تاسیساتو بریدونه پیل کړي دي.

راپور زیاتوي چې سعودي چارواکي اټکل کوي د حوثیانو پر وړاندې د دغه هېواد پوځي عملیات ښايي تر شپږو نورو میاشتو پورې دوام وکړي. د سعودي ولیعهد محمد بن سلمان د چهارشنبې په ورځ په ریاض کې د امریکا د مرکزي قوماندانۍ له قوماندان اډمیرال برېډ کوپر سره هم لیدلي دي.