<p style="text-align: justify;">کابل (پژواک، ۲۹ زمری ۱۴۰۳): د ټولګټو وزارت وایي، د ا.ا د مشرتابه د حکم پر بنسټ، د کابل – غزني او کابل - جلالاباد دویم لین سړکونو جوړولو چارې د ټولپلازا په بدل کې بېرته پیلېږي.</p>
<p style="text-align: justify;">د ټولګټو وزارت ویاند محمداشرف حقشناس پر خپله اېکسپاڼه لیکلي چې د کابل - غزني او کابل - جلالاباد پر لویو لارو د وسایطو د ډېرې ګڼېګوڼې له امله خلک له ترافیکي ستونزو سره مخ دي.</p>
<p style="text-align: justify;">هغه لیکلي: «په همدې اساس د ا.ا د مشرتابه د حکم پر بنسټ او د ټولګټو وزارت له پلان سره سم د کابل – غزني دویم لین سړک او د کابل – جلال اباد دویم لین سړک د پاتې برخو (د کابل ولایت له خاکجبار ولسوالۍ د ننګرهار تر مملې باغ سیمې پورې) د اساسي جوړولو کار د یاد وزارت له خوا د ټولپلازا په بدل کې بېرته پیلېږي.»</p>
<p style="text-align: justify;">حقشناس په دې اړه نور جزئیات نه دي ورکړي خو لیکلي یې دي چې د یادو سړکونو په جوړېدو سره به د خلکو ترانسپورټي ستونزې هوارې شي او د سوداګریزو او کرنیزو توکو په چټک لېږد رالېږد کې به د پام وړ اسانتیاوې رامنځته شي.</p>
