خیبر پښتونخوا کې د پولیسو یوه مرکز کې چاودنې یو کس وژلی او ۲۵ نور یې ټپیان کړي

 کابل (پژواک، ۶ تله ۱۴۰۳): د راپورونو له مخې، د خیبر پښتونخوا د صوابۍ سیمې د پولیسو په یوه مرکز کې دننه چاودنه شوې چې له امله یې یو کس وژل شوی او ۲۵ نور ټپیان دي.

مشال راډیو نن په یوه راپور کې ویلي چې د خیبر پښتونخوا د صوابۍ په تاڼه «حوزه» کې د برېښنا مزو د شارټۍ له امله چاودنه رامنځه شوې چې یو کس پکې وژل شوی او ۲۵ نور ټپیان دي.

پولیس وايي چې تېره شپه د سپټمبر په ۲۶مه ماسختن مهال لومړی د ښار «تاڼې» برېښنا شارټ شوه چې له امله یې اور ولګېد او بیا د بارودو په ګودام کې چاودنه وشوه.

د صوابۍ سیمې د پولیسو مشر هارون الرشید له پېښې وروسته رسنیو ته ویلي چې په ګودام کې هغه بارود ایښي وو چې پولیسو د بېلابېلو عملیاتو پر مهال ترلاسه کړي وو.

نوموړی وایي، په چاودنه کې د یاد مرکز څلور خونې ویجاړې شوې او د پولیسو موټرونه هم زیانمن شوي دي.

مشال راډیو د یوه پولیس معشوق علي  له قوله لیکلي: «له لمانځه وروسته د تاڼې ودانۍ د محرر دفتر ته روان وم چې هلته چاودنه وشوه او په کې زه هم ژوبل شوم.»

هغه زیاته کړې چې ډېرې ټپیان پولیس دي.