<p style="text-align: justify;">کابل (پژواک، ۶ تله ۱۴۰۳): د پوهنې وزارت وایي، د غزني ولایت د جاغوري، مالستان او اجرستان ولسوالیو اوسېدونکو د روان کال په تېرو شپږو میاشتو کې د پوهنې له برخې سره ۲۰ میلیونه افغانۍ مرسته کړې ده.</p>
<p style="text-align: justify;">د پوهنې وزارت پرون پر خپله اېکسپاڼه لیکلي، د غزني ولایت پوهنې ریاست پلاوی جاغوري، مالستان او اجرستان ولسوالیو ته د ښوونځيو شوراګانو د جوړولو په موخه تللی و.</p>
<p style="text-align: justify;">سرچینې د یاد پلاوي له قوله لیکلي، د روان ۱۴۰۳ کال په لومړیو شپږو میاشتو کې د یاد ولایت د جاغوري، مالستان او اجرستان ولسوالیو اوسېدونکو د همدغو ولسواليو د ښوونځيو په بيارغونه، د درسي ټولګيو په جوړولو، د پاکو اوبو د څاګانو کيندلو او نورو اړوند برخو کې په ټوليزه توګه ۲۰ میليونه افغانۍ مرسته کړې ده.</p>
<p style="text-align: justify;">دغه وزارت زیاته کړې، د ښوونځیو شوراګانې ډېرې اغېزناکې دي؛ د ښوونځیو او کورنیو ترمنځ د پله حیثیت لري.</p>
<p style="text-align: justify;">د پوهنې وزارت وایي، دغو ولسوالیو ته د پوهنې ریاست د پلاوي د سفر اساسي موخه په یو شمېر هغو تعلیمي ادارو کې د ښوونځیو شوراګانو جوړول وو چې تر اوسه پکې شوراګانې نه وې جوړې شوې.</p>
<p style="text-align: justify;">دا په داسې حال کې ده، د پوهنې وزارت پرون په یو بل خبر کې ویلي چې د لوګر ولايت د خروار ولسوالۍ اړوند د چرخي کلي یوه اوسېدونکي د سادات لېسې د ودانۍ لپاره ځمکه وقف کړه.</p>
