<p style="text-align: justify;">کابل (پژواک، ۸ تله ۱۴۰۳): د هسپانیې چارواکو ویلي، د دغه هېواد «کنري ټاپوګانو» سیمې سره نږدې د کډوالو یوه کښتۍ چپه شوې چې له امله یې لږ تر لږه نهه کسان مړه شوي او ۴۸ نور تري تم شوي دي.</p>
<p style="text-align: justify;">د امریکا غږ راپور له مخې، د هسپانیې د سمندري ژغورنې ملي ادارې ویلي چې د دې کښتۍ له سپرلیو یې ۲۷ تنه ژغورلي دي.</p>
<p style="text-align: justify;">سرچینې لیکلي چې په دې پېښه کې نهه کسان مړه شوي او ۴۸ نور نادرکه شوي دي.</p>
<p style="text-align: justify;">راپور کې راغلي، تر اوسه نه ده معلومه چې دا کډوال د کومو هېوادونو اتباع وو، خو د لوېدیځې افریقا هېوادونو ډېر خلک په همدغو خطرناکو لارو ځانونه هسپانیا ته رسوي.</p>
<p style="text-align: justify;">د یادونې ده چې د روانې سپټمبر میاشتې په پیل کې هم ۳۹ کسانو په یاده سیمه کې د کښتۍ ډوبېدو پېښه کې ژوند بایللی و.</p>
