لغمان کې درېیو کسانو ته تعزیري سزا ورکړل شوه

مهترلام (پژواک، ۹ تله ۱۴۰۳): ستره محکمه وايي، په لغمان ولایت کې یوه مجرم او دوو تورنو کسانو ته په عام محضر کې تعزیري سزا ورکړل شوه.

د سترې محکمې په خبرپاڼه کې راغلي، د لغمان ولايت د ښاري ابتدائيه محکمې د جزا دېوان د پرېکړې په اساس يوه کس ته داخلاقي فساد په جرم او دوو نورو کسانو ته چې پر لواطت متهم وو، په عام محضر کې تعزیري سزا ورکړل شوه.

سرچېنې لیکلي، محکمې د یادو کسانو له ډلې يو مجرم پر ۳۹ دُرو تعزیري سزا او څلور کاله او شپږ مياشتو تنفيذي بند او دوه متهمين يېپر يو ـ یو کال تنفيذي بند او ۳۹ ـ ۳۹ دُرو تعزیري سزا محکوم کړي وو.

خبرپاڼه کې راغلي، ياد حکم د سترې محکمې د عالي مقام له تائيد وروسته پلې شو.