<p style="text-align: justify;">کابل (پژواک، ۱۹ تله ۱۴۰۳): راپورونه وايي چې دا مریکا په فلورېډا ایالت کې د «مېلټن» په نوم د توپان له امله شاوخوا دوه میلیون کسانو ته د خپلو کورونو د پرېښودو او خوندي ځای ته د تلو امر شوی دی.</p>
<p style="text-align: justify;">د امریکا غږ نن <strong><a href="https://www.voadeewanews.com/a/florida-braces-for-potentially-destructive-hurricane-milton/7817081.html">راپور</a> </strong>ورکړی چې د امریکا په فلورېډا کې شاوخوا دوه میلیون کسانو ته له خپلو کورونو او سیمو د وتلو امر شوی.</p>
<p style="text-align: justify;">ورته مهال، د بيبيسي د <strong><a href="https://www.bbc.com/pashto/articles/cp39ldd71ezo">راپور</a> </strong>له مخې، اوسمهال په فلورېډا کې د کورونو د تخلیې کمسارې لړۍ پیل شوې او د امریکا ولسمشر جو بایډن دا تخلیه د مرګ او ژوند تر منځ د غوراوي یوه هڅه بللې.</p>
<p style="text-align: justify;">امریکا کې چارواکو ویلي، د هوریکان مېلټن سمندري توپان تر ټولو د ډېر ګواښ وړاندوینه د فلورېډا لویډیځه غاړه (ټمپه سیمه) کې شوې ده.</p>
<p style="text-align: justify;">د دغه توپان چټکتیا په ساعت کې ۲۷۰ کېلومتره بلل شوې او د پنځمې درجې توپان بلل شوی، په دې مانا چې چټک بادونه او څپې یې په لنډ وخت کې ډېر زیان اړولی شي.</p>
<p style="text-align: justify;">امریکا کې د یوې میاشتې په موده کې دا د سمندري توپان دویمه زوروره څپه ده، له دې دوه اوونۍ مخکې د «هوریکان هېلن» په نوم سمندري څپو په فلورېډا، جورجیا، سوېلي کارولینا، ویرجینیا او شمالي کارولینا کې لږ تر لږه ۲۲۵ کسان وژلي وو.</p>
<p style="text-align: justify;">په همدې مهال، د فلورېډا یو شمېر اوسېدونکو بيبيسي ته ویلي، د توپان له امله د وتلو سپارښتنه ناوخته ور رسېدلې او اوس ناوخته دی چې له کورونو ووځي، دوی شکایت کړی چې په سیمه کې د هټيو تړلو یې ژوند لا له ګواښ سره مخ کړی دی.</p>
<p style="text-align: justify;">په ورته مهال، د فلورېډا ایالت په زندانونو کې بندي زرګونه مجرمین هم نورو سیمو ته لېږدول شوي، د امریکا د اصلاحاتو مرکزي ادارې تر دې دمه په خوندي ډول د څه کم ۵۰۰۰ بندیانو د لېږد پخلی کړی دی.</p>
