<p style="text-align: justify;">لښکرګاه (پژواک، ۲۵ تله ۱۴۰۳): د هلمند په مرکز لښکرګاه ښار کې د خصوصي سکټور له خوا د نږدې ۴۲ میلیون افغانیو په لګښت د شیدو د پروسس یوې پخوانۍ تخریب شوې کارخونې بیارغونې چارې پیل شوې.</p>
<p style="text-align: justify;">د دې کارخونې د بیارغونې چارې نن د هلمند په مرکز لښکرګاه ښار کې د یو شمېر حکومتي چارواکو په حضور کې پیل شوې.</p>
<p style="text-align: justify;">د هلمند د کرنې او مالدارۍ ریاست رییس مولوي نیازمحمد وهاج پژواک خبري اژانس ته وویل، یاده کارخونه د ظاهرشاه واکمنۍ پر مهال جوړه شوې چې د تېرو حکومتونو پر مهال یې ودانۍ او وسایل په بشپړ ډول ویجاړ شوي وو چې اوس یې یو ځل بیا د خصوصي سکټور د ۴۲ میلیون افغانیو په لګښت د بیارغونې چارې پیل شوې چې د شپږو میاشتو په موده کې به بشپړې شي.</p>
<p style="text-align: justify;">نوموړي زیاته کړه: «په دې فابریکه کې به په اتو ساعتونو کې ۴۰ ټنه شیدې پروسس کېږي چې شیدې، مستې، شړومبې، پنیر، پېروی او شیدېلرونکې انرژیاني به تولیدوي او د هلمند ترڅنګ به د هېواد نورو ولایتونو ته هم وړل کېږي.«</p>
<p style="text-align: justify;">ورته مهال، د یادې کارخونې مسوول ډاکټر محمدالله وویل: «موږ به د هلمند له ټولو ولسوالیو شیدې راوړو او په دې فابریکه کې به ورڅخه استفاده کېږي.»</p>
<p style="text-align: justify;">هغه زیاته کړه، په دې کارخونه کې به ۱۲۰ کسانو ته په مستقیم او شاوخوا څلور زره کسانو ته په غیرمستقیم ډول د کار زمینه برابره شي.</p>
<p style="text-align: justify;">د یادونې ده، د اسلاميامارت له بیا واکمنېدو وروسته په دغه ولایت کې په بېلابېلو برخو کې یو شمېر صنعتي فابریکې فعالې شوې چې د مسوولینو د معلوماتو له مخې، زرګونو کسانو ته پهکې د کار زمینه برابره شوې ده.</p>
