پلخمري (پژواک، ۲۹ تله ۱۴۰۳) د بغلان د پوهنې ریاست مسوولین وایي، د دغه ولایت د مرکز پلخمري په ګډون د شپږو ولسوالیو په لرې پرتو سیمو کې څه باندې ۲۹ زره ماشومان د بېلابېلو موسسو له لوري په جوړو شوو کلیوالي ټولګیو کې زدهکړې کوي.
د بغلان د پوهنې ریاست د کیفیت د تضمین څانګې مسوول محمدعمرعمري پژواک خبري اژانس ته وویل، د دغه ولایت د مرکز پلخمري په ګډون د شپږو ولسوالیو په لرو پرتو سیمو کې د بېلابېلو موسسو په ملاتړ په ۹۸۷ جوړو شوو سیمهییزو ټولګيو کې ۲۹ زره او ۲۳ ماشومان چې نجونې هم پهکې شاملې دي، پر لومړنیو زدهکړو بوخت دي.
هغه زیاته کړه، د یادو ټولګیو ټول زدهکوونکي هغه ماشومان دي چې له ښوونځيو څخه د لرېوالي له امله له زدهکړو پاتې دي او یا هم تازه له کډوالۍ هېواد ته راستانه شوي چې له شپږم ټولګي وروسته به دولتي ښوونځیو کې شامل کړل شي.
د نوموړي په خبره، د دغو ټولګیو ۵۰ سلنه زدهکوونکي نجونې دي چې د ۱۲۱۰ ښځینه او نارینه ښوونکو له لوري ورته د پوهنې وزارت ښوونیز نصاب تدریسېږي.
مسوولین وايي، یاد ټولګي د پلخمري ښار په ګډون په مرکزي بغلان، بورکې، نهرین، دهنهغوري، دوشي او خنجان ولسوالیو کې فعالیت لري.
