<p style="text-align: justify;">جلالاباد (پژواک، ۲۹ تله ۱۴۰۳): د ننګرهار د کرنې او مالدارۍ رياست وايي چې د دغه ولایت په دوو ولسوالیو کې د بېوزلو کورنیو د اقتصادي ملاتړ په موخه ۱۴۰ مېرمنو ته د هګیو چرګانو کوچني فارمونه جوړ شول.</p>
<p style="text-align: justify;">د ننګرهار د کرنې، اوبولګولو او مالدارۍ رييس مولوي محمدولي محسن نن (د تلې ۲۹مه) پژواک خبري اژانس ته وويل، ستاسو غږ سازمان (Your Voice Organization) په مالي همکارۍ يې په کوټ او بټيکوټ ولسواليو کې ۱۴۰ مېرمنو او کورنيو ته د هګیو چرګانو روزنې فارمونه جوړ کړل.</p>
<p style="text-align: justify;">هغه زیاته کړه چې دغه مرسته یې د بېوزله کورنيو لاسنيوي، اقتصادي ودې او د چرګانو صنعت پراختيا په موخه کړې ده.</p>
<p style="text-align: justify;">دی وایي، هر کس ته ۳۰ چرګان، ۱۵۰ کیلوګرامه دانه، مرغانچه، جالۍ، کړکۍ، دروازه، د اوبو او دانې لپاره وسايل ووېشل شول او دغه راز هرې کورنۍ ته د خپلو اړتیاوو پوره کولو لپاره ۵ زره او ۲۰۰ افغانۍ هم ورکړل شوې.</p>
<p style="text-align: justify;">د مرستو ترلاسه کوونکي وايي چې د چرګانو ساتنې برخه کې دې روزنه او د هغو د شمېر ډېرولو برخه کې دې هم مرسته ورسره وشي.</p>
<p style="text-align: justify;">حمیدالله چې د کورنۍ یوې غړې ته يې د چرګانو روزنې دغه کوچنی فارم جوړ شوی، وايي، دا به يې د کورني اقتصاد په پیاړتیا کې ګټور تمام شي.</p>
<p style="text-align: justify;">اقتصاد پوهان وايي، دا ډول کوچني کاروبارونه کولای شي چې هم د کورنيو تولیداتو کچه لوړه کړي او هم یې اقتصاد ښه شي.</p>
