د لوګر لوړو زده‌کړو موسسه کې اته پروژې ګټې اخیستنې ته وسپارل شوې

<p style="text-align: justify;">پل‌علم (پژواک، ۳ لړم ۱۴۰۳): د لوګر ولایت د لوړو زده‌کړو موسسه کې د ۶۶ میلیون افغانیو په لګښت د اتو رغنیزو پروژو چارې بشپړې او ګټې اخیستنې ته وسپارل شوې.</p>

<p style="text-align: justify;">د یادو پروژو پرانيستې مراسمو کې د لوړو زده‌کړو وزارت سرپرست وزیر مولوي ندا‌ءمحمد ندیم او د لوګر ولایت سیمه‌ییزو چارواکو ګډون کړی و.</p>

<p style="text-align: justify;">د لوګر لوړو زده‌کړو موسسې ريیس مولوي ضیاالاحمد صارم وویل، په دغو پروژو کې د لوړو زده‌کړو موسسې احاطوي دیوال، عمومي دروازه، څلور ژورې څاګانې، یو معیاري کانټېن، یو سایه‌بان، لوړو زده‌کړو مؤسسې ته د برېښنا او نوري فایبر نښلول شامل دي.</p>

<p style="text-align: justify;">نوموړي همدارنګه زیاته کړه، د یادو پروژو له پرانيستې سره اوس د دغه ولایت د لوړو زده‌کړو موسسې د ښوونکو او محصلینو ډېرې ستونزې هوارې شوې دي.</p>

<p style="text-align: justify;">بلخوا د لوړو زده‌کړو وزارت سرپرست مولوي نداءمحمد ندیم وویل، لوړو زده‌کړو وزارت د هېواد په کچه د پوهنتونونو او لوړو زده‌کړو موسسو ودانیو او اړتیاوو پوره کولو ته لومړیتوب ورکړی دی.</p>

<p style="text-align: justify;">د ده په وینا، که چېرې په هر ولایت کې پوهنتونونه او د لوړو زده‌کړو موسسې معیاري ودانۍ او اسانتیاوې ولري، محصلین به یې په لوړ معیار وروزل شي.</p>

<p style="text-align: justify;">نوموړي همدارنګه زیاته کړه، هڅه کوي چې د لوګر ولایت د لوړو زده‌کړو موسسې برخه کې شته ستونزې حل کړي.</p>

<p style="text-align: justify;">دا په داسې حال کې ده چې تېره ورځ هم د لوړو زده‌کړو سرپرست وزير لوګر کې یوې غونډې ته ویلي وو چې د عصري علومو زده کول یوه مهمه اړتیا ده.</p>