<p style="text-align: justify;">کابل (پژواک، ۱۷ لړم ۱۴۰۳): د جوګیانو قوم د ستونزو او اړتیاوو په اړه د پژواک خبري اژانس د راپور له خپرېدو وروسته د سرحدونو، قومونو او قبایلو چارو وزارت وايي چې د ا.ا د مشرتابه د فرمان له مخې په هېواد کې ټول جوګیان او جټان ثبتیږي.</p>
<p style="text-align: justify;">پژواک خبري اژانس د روان کال د لړم په ۲مه یو <a href="https://pajhwok.com/ps/2024/10/23/joins-in-kabul-the-islamic-emirate-is-given-the-land-for-construction/">راپور</a> خپور کړ چې په هغه کې د جوګي قوم ځینو کورنیو له اسلامي امارت د استوګنیزو ځمکو د وېش او نورو ستونزو ته یې د رسېدنې غوښتنه کړې وه.</p>
<p style="text-align: justify;">د هېواد د سرحدونو، قومونو او قبایلو چارو وزارت نن (پنجشنبه، د لړم ۱۷مه) د یوې <a href="https://x.com/MOBTA/status/1854387739438842267">خبرپاڼې</a> په خپرولو سره لیکلي چې د اسلامي امارت د رهبرۍ د ځانګړي فرمان پر اساس، د ځمکو د غصب د مخنیوي کمېسیون ته دنده سپارل شوې څو په هېواد کې مېشت جوګيان او جټان ثبت او راجسټر کړي.</p>
<p style="text-align: justify;">په خبرپاڼه کې راغلي چې په همدې مناسبت د سرحدونو قومونو او قبایلو وزارت د سرحدي پلټنې معین مولوي اسماعیل غزنوي په مشرۍ د ځمکو د غصب د مخنیوي کمېسیون غړو ته دنده وسپارل شوه څو هېواد کې د مېشتو جوګیانو او جټانو د ژوندکولو ځای معلومولو او هویت پیدا کولو لپاره څېړنې وکړي.</p>
<p style="text-align: justify;">سرچینه وايي چې په یاده ناسته کې یوه کمېټه د کډوالو او بېرته راستنېدونکو چارو، کرنې، اوبو لګولو او مالدارۍ، عدلیې وزارتونو او د احصایې ملي ادارې له استازو جوړه شوه.</p>
<p style="text-align: justify;">سرچینه زیاتوي چې جوړه شوې کمېټه به د مېشتو جوګيانو او جټانو د ثبت او راجسټر پروسه په بشپړ صداقت او دقت سره په ټول هېواد کې عملي کړي او دغه پروسه به د جوګيانو او جټانو لپاره د اساسي حقونو په تامین کې مهم رول ولوبوي.</p>
<p style="text-align: justify;">دا په داسې حال کې ده چې د اسلامي امارت ویاند ذبیحالله مجاهد له دې مخکې پژواک خبري اژانس ته ویلي وو چې ا.ا د هېواد ټولو خلکو ته په یوه نظر ګوري، ترمنځ یې توپیر نه کوي او د جوګیانو په ګډون د افغانستان ټول خلک په افغانستان کې د ژوند او امنیت حق لري او د هېواد وګړي او اتباع ګڼل کېږي.</p>
<p style="text-align: justify;">د هغه په وینا، اسلامي امارت ځان ته لازمه ګڼي چې د ټولو وګړو او افغانانو حقونو ته چې دلته ژوند کوي رسېدنه وکړي.</p>
<p style="text-align: justify;"></p>
<p style="text-align: justify;"></p>
<p style="text-align: justify;"></p>
