سمنګان کې د ترافیکي پېښې له امله دوه کسان مړه او درې نور ټپیان شوي

<p style="text-align: justify;">اېبک (پژواک، ۲۵ لړم ۱۴۰۳): د سمنګان ځایي مسوولین وايي، د دغه ولایت د حضرت سلطان ولسوالۍ د ډبرو سکرو مارکېټ مربوطاتو کې د ترافیکي پېښې له امله دوه کسان مړه او درې نور ټپیان شوي دي.</p>

<p style="text-align: justify;">د سمنګان امنیې قوماندانۍ ویاند حشمت‌الله رحماني پژواک خبري اژانس ته وویل، یاده پېښه نن (جمعه، د لړم ۲۵مه) مخکې له غرمې شوې ده.</p>

<p style="text-align: justify;">هغه زیاته کړه، یاده پېښه د حضرت سلطان ولسوالۍ د ډبرو سکرو مارکېټ په مربوطاتو کې له سړکه د یوه پراډو موټر وتلو له امله شوې چې په پایله کې یې دوه کسان مړه او درې نور ټپیان شوي دي.</p>

<p style="text-align: justify;">هغه څرګنده کړه، په دې پېښه کې مړه شوي او ټپي کسان د سمنګان ولایتي روغتون ته لېږدول شوي دي.</p>

<p style="text-align: justify;">د سمنګان مسوولینو د یادې پېښې لامل د چلوونکي له حده ډېر سرعت بللی دی.</p>