زابل کې د یوه پله بیارغولو چارې پشبړې شوې

کابل (پژواک، ۳۰ لړم ۱۴۰۳): د افغانستان د ټولګټو وزارت وايي چې د زابل ولایت په شینکۍ ولسوالۍ کې د شاوخوا ۴۱ میلیونه افغانیو په لګښت د یوه اوسپنيز کانکریټي پله د بیارغولو چارې بشپړې شوې.

د یاد وزارت ویاند محمداشرف حق‌شناس نن پرخپله اېکس‌پاڼه لیکلي چې د زابل ولایت په شينکۍ ولسوالۍ کې د قلات - شينکۍ پر مسير د يوه اوسپنيز کانکریټي پله د بیارغونې چارې بشپړې شوې.

هغه زیاته کړې، دغه پل چې ۵۶،۱۵ متره اوږدوالی لري، د بیارغولو قرارداد یې تېر کال د ټولګټو وزارت او صداقت افغان ودانيز شرکت ترمنځ شوی و.

د ده په وینا، د دغه پله د بیارغولو چارې د یو کال په موده کې بشپړې شوې او شاوخوا ۴۱ ميليونه افغانۍ لګښت پرې راغلی دی.

حق‌شناس وايي، ياد پل چې د زابل ولايت شملزو، اتغر او شينکۍ ولسوالۍ له مرکز قلات سره نښلوي د وروستیو کلونو د سېلابونو له امله تخریب شوی و چې د يادو ولسواليو اوسېدونکي یې د تګ- راتګ پرمهال له ستونزو سره مخ کړي و.

د نوموړي د معلوماتو له مخې، د یاد پله په بیارغونې سره به خلک مرکز قلات ته په اسانۍ سره تګ او راتګ کوي.