<p style="text-align: justify;">کابل (پژواک، د لېندۍ لومړۍ نېټه ۱۴۰۳): د امریکا متحده ایالتونو غزه کې د اوربند په اړه د ملګرو ملتونو امنیت شورا پرېکړهلیک وېټو کړی دی.</p>
<p style="text-align: justify;"><a href="https://www.theguardian.com/world/2024/nov/20/un-gaza-vote-veto">ګارډین</a> راپور ورکړی چې د امنیت شورا له ۱۴ غړو یوازې د امریکا متحده ایالتونو د پرېکړهلیک له تصویب د مخنیوي لپاره مخالفه رایه ورکړه.</p>
<p style="text-align: justify;">د پرېکړهلیک په طرحه کې چې د امنیت شورا د لسو دایمي غړو له لوري وړاندې شوې وه، پر «سمدستي، بې قید او شرطه او دایمي اوربند» ټینګار کړی او دغهراز په جلا ډول یې د یرغمل شوو کسانو خوشي کېدو غوښتنه کړې وه.</p>
<p style="text-align: justify;">د ملګرو ملتونو امنیت شورا کې د امریکا د استازي مرستیال رابرټ ووډ ویلي چې یاد پرېکړهلیک د یرغمل شوو سمدستي خوشي کېدو ته اشاره نه ده کړې.</p>
<p style="text-align: justify;">د امریکا له لوري د یاد پرېکړهلیک وېټو کول د نورو ډېرو هېوادونو غبرګون راپارولي او هغوی څرګنده کړې چې ملګري ملتونه په غزه کې د سولې په ټينګېدو کې ناکام دي.</p>
<p style="text-align: justify;">امنیت شورا کې د فرانسې استازي نیکلاس دو ویلي چې یاد پرېکړهلیک د یرغملو له خوشي کېدو ملاتړ کوي، خو امریکا رد کړې ده.</p>
<p style="text-align: justify;">ورته مهال، د چین استازي هم ویلي: «هر ځل چې متحده ایالتونه د خپل وېټو له حقه د اسرائیل د ملاتړ لپاره کار اخیستی، په غزه کې وژنې ډېرې شوې دي.»</p>
<p style="text-align: justify;">امنیت شورا له ۱۵ غړو جوړه ده چې امریکا، روسیه، چین، برېتانیا او فرانسه یې دایمي غړي دي او د وېټو حق لري.</p>
<p style="text-align: justify;">دا لومړی ځل نه دی چې امریکا یا د امنیت شورا نور دایمي غړي په غزه کې د اروبند په اړه پرېکړهلیک وېټو کوي.</p>
<p style="text-align: justify;">تېر کال هم په لېندۍ میاشت کې د ملګرو ملتونو امنیت شورا د روسیې او چین د وېټو له امله د یرغمل شوو کسانو خوشي کولو د موافقې د یوې برخې په توګه په غزه کې د سمدستي اوربند لپاره د متحده ایالتونو له لوري وړاندیز شوی پرېکړهلیک تصویبولو کې ناکام شو.</p>
<p style="text-align: justify;">خو د سږ کال په وري میاشت کې امنیت شورا د غزې په تړانګه کې د اوربند پرېکړهلیک له ۱۴ موافقو رایو سره تصویب کړ. یاد پرېکړهلیک کې په سیمه کې د بېړني او دایمي اوربند، د یرغمل شوو خوشي کېدو او غزې ته د بشري مرستو لېږلو غوښتنه شوې وه.</p>
<p style="text-align: justify;">د غزې اوسنۍ جګړه چې ۱۳ میاشتې اوږده شوه، نږدې ۴۴ زره کسان په کې وژل شوي او د غزې نږدې ټول وګړي یې بېځایه کړي دي.</p>
