فیضاباد (پژواک، ۱۱ لېندۍ ۱۴۰۳): بدخشان کې امنیتي مسوولین وايي، دغه ولایت کې یې د کوکنارو د کښت په تړاو ۳۱ بزګران نیولي دي.
د بدخشان امنیې قوماندانۍ له نشهیي توکو سره د مبارزې مدیر شفیقالله حفیظي د یاد مطلب په بیانولو سره وايي، نیول شوي کسان د یفتل پایان، ارګو او د دغه ولایت د مرکز فیضاباد ښار د اوومې ناحیې اوسېدونکي دي.
هغه زیاتوي، د بزګرانو له نیولو مخکې د کوکنارو د کښت مخنیوي کمېټې هغوی ته د نشهیي توکو د کښت او قاچاق د بندیز اړوند د اسلامي امارت د رهبرۍ پیغام رسولی و خو کروندګرو هغه ته پاملرنه ونه کړه او د کوکنارو کښت ته یې ادامه ورکړه چې په پایله کې د پولیسو له لورې ونیول شول.
د بدخشان د امنیې قوماندانۍ له نشهیي توکو سره د مبارزې مدیر زیاته کړه، نیول شوي کسان نشهیي توکو سره د مبارزې مدیریت ته لېږدول شوي او د بدخشان ښاري لومړنۍ محکمې ته سپارل شوي څو قضیې یې وڅېړل شي.
هغه ټینګار کوي چې د بدخشان د امنیې قوماندانۍ له نشهیي توکو سره د مبارزې مدیریت ځواکونه د کوکنارو د کښت مخنیوي په موخه د دغه ولایت د ولسوالیو په ځینو سیمو کې مېشت دي او د سرغړونې په صورت کې به له بزګرانو سره قانوني چلند وکړي
