<p style="text-align: justify;">کابل (پژواک، ۱۲ لېندۍ ۱۴۰۳): د راپورونو له مخې، د لوېدیځې افریقا په ګینه هېواد کې د فوټبال لوبې پر مهال د نندارچیانو ترمنځ شخړه کې شاوخوا ۱۰۰ کسان وژل شوي دي.</p>
<p style="text-align: justify;">د نیویارک ټایمز د<a href="https://www.nytimes.com/2024/12/01/world/africa/guinea-soccer-match-violence-deaths.html"> راپور</a> له مخې، دا پېښه د یکشنبې په ورځ د لوېدیځې افریقا په ګینه هېواد کې شوې ده.</p>
<p style="text-align: justify;">سرچینې د سیمهییزو روغتونونو له قوله لیکلي، په دې پېښه کې لسګونه کسان چې شمېر یې له سلو هم اوړي، مړه شوي دي.</p>
<p style="text-align: justify;">یاده شخړه د فوټبال لوبې د نندارچیانو ترمنځ وروسته له هغه شوې چې لوبڅار یوه جنجالي پرېکړه وکړه او په غبرګون کې یې نندارچیانو میدان ته ور ودانګل.</p>
<p style="text-align: justify;">د سرچینې د معلوماتو له مخې، د فوټبال دا لوبه د ګینه د نظامي مشر مامادي دومبویا په ویاړ جوړه شوې وه چې د ۲۰۲۱ کال د سپټمبر په میاشت کې یې له کودتا وروسته واک ترلاسه کړ.</p>
