هرات (پژواک، ۱۴ لېندۍ ۱۴۰۳): هرات کې سیمهییز مسوولین وايي چې په دغه ولایت کې لسګونه روږدي د درملنې او مراقبت له ۱۲ میاشتنۍ دورې وروسته نن بېرته له خپلو کورنیو سره یوځای شول.
د هرات د امنیې قوماندانۍ له نشهیي توکو سره د مبارزې عمومي مدیر مولوي حیاتالله روحاني وايي چې په دغه ولایت کې شاوخوا ۱۸۰ روږدي د درملنې ۱۲ میاشتنۍ دورې له بشپړېدو وروسته نن خپلو کورنیو ته وسپارل شول.
هغه زیاته کړه، درملنه شوي یاد کسان له نشهیي توکو سره د مبارزې مدیریت له لوري د ښار له بېلابېلو برخو راټول شوي وو.
په هرات کې له نشهیي توکو سره د مبارزې مسوولین وايي، له تېرو دوو کلونو راهیسې د دغه ولایت په څلور زره بستریز روغتون کې د څه باندې ۱۲ زره په نشهيي توکو روږدو کسانو درملنه شوې ده.
بلخوا، بېرته رغېدلي خوښ دي چې د درملنې زمینه ورته برابره شوې او له حکومته غواړي څو د کار زمینه هم ورته برابره کړي.
د یادولو ده، له تېرو دوو اونیو راهیسې په یاد مرکز کې ۳۵۰ روږدي تر درملنه وروسته رخصت او له خپلو کورنیو سره یوځای شوي دي.
