کابل (پژواک، ۱۷ لېندۍ ۲۰۲۴): په کابل کې د سرحدونو، قومونو او قبایلو چارو وزارت اړوند له درېیو لېسو او یوه انسټیټیوټ څخه ۶۰۹ کسان فارغ شول.
د دغه وزارت د همغږۍ معین مولوي محمدعليجان احمد د یادو زدهکوونکو فراغتغونډه کې د تعلیم پراختیا او د دیني او دنیوي زدهکړو ترمنځ د توازن پر اهمیت ټینګار وکړ.
هغه وویل: «دنيا دارلاسباب ده، تاسې سوچ ورته وکړئ، دنیا چېرې رسېدلې ده، دا عصري علم چې ورته وايي دا هم زموږ او ستاسې فریضه راځي، دا هم زموږ او ستاسې وجيبه راځي، لکه دومره بايد د دې موږ اهتمام ونه کړو، لکه د دين چې کېږي، هغه د الله پاک مقصود ده، دا زما او ستا د دنيا مقصود ده.»
نوموړي زیاته کړه چې په تېرو وختونو کې د مدرسې او ښوونځي ترمنځ واټن موجود و، خو اوس دغه واټن له منځه تللی دی.
د یاد وزارت د ښوونې او روزنې رییس عبدالرحمن رحماني وویل چې په ۱۴۰۳ کال کې د دغه وزارت له اړوندو لېسو لکه له رحمنبابا لېسې ۲۸۰، له خوشال خان ۲۳۹، له پیرمحمد کاکړ ۴۵ او له بایزید روښان انسټیټیوټ څخه ۴۵ کسان فارغ شول.
دی وایي، تېر کال د یادو لېسو ۳۳۲ فارغینو پوهنتونونو ته لاره پیدا کړې وه.
ورته مهال، له یادو لېسو ځینو تازه فارغینو له حکومته د لوړو زدهکړو زمینې برابرولو غوښتنه وکړه.
د رحمن بابا له لېسې فارغ زدهکوونکی احمدشاه وایي، په سختو شرایطو کې یې زدهکړې کړې او اوس باید د نورو زدهکړو زمینه ورته برابره شي.
د بایزید روښان انسټیټیوټ له کمپوټرساینسع فارغ حیدر منګل بیا وویل چې ډېر فارغین د مسلکي او تخنیکي زدهکړو له مخې فارغ شوي، نو حکومت باید د دغو فارغینو لپاره د کار فرصتونه رامنځته کړي څو هغوی خپلې پوهه او مهارتونه په ښه توګه وکاروي.
ده زیاته کړه: «موږ مسلکي روزل شوي یوؤ اوس دا زموږ حق دی چې حکومت زموږ لپاره د کار فرصتونه برابر کړي.»
د یادونې ده، په ټول هېواد کې نهه لېسې او یو انسټیټوټ د قومونو او قبایلو وزارت پورې تړاو لري چې له لرو پرتو او سرحدي سیمو زدهکوونکي په کې په زدهکړو بوخت دي.
