غزني او هلمند کې درې رغنیزې پروژې بشپړې شوې

غزني ښار - لښکرګاه (پژواک، ۲۲ لېندۍ ۱۴۰۳): په غزني او هلمند ولایتونو کې د څه باندې نهه میلیون افغانیو په لګښت درې رغنیزې پروژې بشپړې او ګټې اخیستنې ته وسپارل شوې.

د غزني سیندیزې فرعي حوزې تخنیکي انجنیر نذیر سحر پژواک خبري اژانس ته وویل چې د دغه ولایت د ګیلان ولسوالۍ په خوزیو او د مقر ولسوالۍ په سه ګانسه سیمو کې د اوبو دوه کوچني چګډیمونه جوړ شول.

هغه وايي چې دغه چکډیمونه د ۶۹۲۰۰ متره مکعب اوبو د زیرمه کولو ظرفیت لري چې په جوړولو یې پنځه میلیونه افغانۍ لګول شوې دي.

سحر وویل، دغه چکډیمونه د باران او واورې اوبو زیرمه کولو، د سېلابونو تخریب د مخنیوي، فصلونو د خړوبولو او ځمکې لاندې اوبو د تغذیې په موخه جوړ شوي دي.

بل لورته، خلک بیا په ولسوالیو کې د نورو چکډیمونو د جوړولو غوښتنه هم کوي.

د مقر ولسوالۍ اوسېدونکي درمحمد پژواک ته وویل چې د ولسوالۍ په کچه دغه یو چکډیم بسنه نه کوي نور هم باید جوړ شي.

دا په داسې حال کې ده چې د حکومت له لوري نږدې په ټولو ولسوالیو کې د چکډیمونو د جوړولو چارې پيل شوي چې ځينې یې بشپړ شوې هم دي.

دغه راز، د یو بل خبر له مخې، هلمند کې د څښاک اوبو رسولو د یوې شبکې چارې بشپړې شوې.

د هلمند د والي ویاند محمدقاسم ریاض پژواک ته وویل چې د واشیر ولسوالۍ په فولاد کلي کې د څښاک پاکو اوبو یوه شبکه جوړه شوه.

هغه وايي چې د دې شبکې پر جوړولو ۴،۵ میلیونه افغانۍ لګول شوې او لګښت د ملګرو ملتونو د ماشومانو ملاتړ صندوق له لوري ورکول شوی دی.

د نوموړي د معلوماتو له مخې، د دې شبکې د جوړولو پرمهال لسګونو کسانو ته د کار زمینه برابره شوې او ۱۱۰ کورنیو ته د څښاک پاکې اوبه برابروي.

د یادونې ده، له دې مخکې هم د یونیسف په مالي ملاتړ په بېلابېلو سیمو کې د څښاک پاکو اوبو رسولو شبکې جوړې شوې دي.