ننګرهار کې د ۱۴ ميليون افغانيو په لګښت د يوه سړک د جوړېدو کار پيل شو

جلال‌اباد (پژواک، ۲۴ مرغومی ۱۴۰۳): د ننګرهار ولايت مرکز جلال‌اباد ښار کې د ۱۴ ميليون افغانيو په لګښت د يوه سړک د جوړېدو چارې پيل شوې.

مسوولین وايي، دا سړک د جلال‌اباد ښار په پنځمه ناحیه کې د ښاروالۍ له بودجې په کانکریټي بڼه رغول کېږي.

د جلال‌اباد ښاروالۍ وياند حامد محمودي د مرغومي په ۲۴مه پژواک خبري اژانس ته وويل چې د جلال‌اباد ښاروالۍ د داخلي عوایدو په مرسته د روان ۱۴۰۳ مالي کال د انکشافي پروژو په لړ کې د پنځمې ناحیې اړوند اووم ګذر کې د ۱۴ میلیون افغانیو په لګښت د سړک، ویالې او پلچکونو د کانکریټ کولو کارونه پیل شول.

هغه زياته کړه، په دې پروژه کې ۸۱۵ متره سړک، د سړک یوې غاړې ته ۸۱۵ متره ویاله او اته پلچکونه شامل دي چې ټول لګښت یې د جلال‌اباد ښاروالۍ له داخلي عوایدو ورکول کېږي.

د محمودي په وينا، د دغه سړک په جوړولو سره به په یاده ساحه کې ترافیکي ګڼه‌ګوڼه کمه شي او ښاریانو ته به د تګ راتګ اسانتیاوې رامنځته شي.

بلخوا، د سيمې اوسېدونکي هم د دغه سړک جوړېدو ته خوښ دي.

د سيمې يوه اوسېدونکي سعيد خان پژواک ته وویل، د دغه سړک په جوړېدو سره به د خلکو ستونزې تر ډېره حل شي.

هغه وويل، د سړک او نورو چارو کیفيت ته بايد ځانګړې پاملرنه وشي او راتلونکي کې دې ورته نورې پروژې هم پلې شي.

د جلال‌اباد ښاروالۍ وايي، هڅه کوي چې د عمومي لارو ترڅنګ د جلال‌اباد ښار ټول فرعي سړکونه هم په پاخه او اساسي ډول جوړ کړي.