کابل (پژواک، ۴ سلواغه ۱۴۰۳): د افغانستان د بهرنیو چارو وزارت چارواکي وايي چې کابل ته د ایران د بهرنیو چارو وزیر سیدعباس عراقچي سفر د دواړو هېوادونو د اړیکو پیاوړتیا لپاره رغنده ګام دی.
کابل کې د ایران سفارت نن سهار اعلان کړی چې د دغه هېواد د بهرنیو چارو وزیر سیدعباس عراقچي به ډېر ژر افغانستان ته سفر وکړي.
یاد سفارت د عراقچي د سفر د وخت په اړه کره جزییات نه دي وړاندې کړي.
د بهرنیو چارو وزارت د درېیم سیاسي ریاست رییس ذاکر جلالي نن (پنجشنبه) پر خپله اېکسپاڼه لیکلي چې د افغانستان او ایران ترمنځ ګډې سیاسي، اقتصادي او امنیتي ګټې د دوه اړخیزو همکاریو پیاوړتیا لپاره ښه فرصتونه دي.
هغه زیاته کړه: «ډېر ژر کابل ته د ایران د بهرنیو چارو وزیر ښاغلي سیدعباس عراقچي سفر د دغو اړیکو د پیاوړتیا لپاره رغنده ګام دی او کولای شي د دواړو هېوادونو ترمنځ اړیکې نوي پړاو ته یوسي.»
