<p style="text-align: justify;">کابل (پژواک، ۴ سلواغه ۱۴۰۳): د راپورونو له مخې، د سعودي عربستان وليعهد محمد بن سلمان د امریکا نوي ولسمشر ته ویلي، هېواد یې هوډ لري چې راتلونکو څلورو کلونو کې امریکا کې ۶۰۰ میلیارد امریکايي ډالر پانګونه کړي.</p>
<p style="text-align: justify;">د رویټرز خبري اژانس د <strong><a href="https://www.reuters.com/world/middle-east/saudi-crown-prince-seeks-600-bln-investment-push-with-us-2025-01-22/">راپور</a> </strong>له مخې، محمد بن سلمان د امریکا له نوي ولسمشر ډونالډ ټرمپ سره ټیلیفوني خبرو کې ویلي چې د هغه له دولته تمه کېدونکي اصلاحات کولای شي د پام وړ اقتصادي وده رامنځته کړي او هوډ لري چې راتلونکو څلورو کلونو کې به په متحده ایالتونو کې ۶۰۰ میلیارد امریکايي ډالر پانګونه کوي.</p>
<p style="text-align: justify;">سلمان په دغو خبرو کې ټینګار کړی چې د مناسبو او اضافي شرایطو د برابرېدو په صورت کې کېدای شي د پانګونې دغه کچه لوړه شي.</p>
<p style="text-align: justify;">د یادولو ده چې ټرمپ د ولسمشرۍ په خپله لومړۍ دوره کې د سعودي عربستان په ګډون د فارس خلیج له هېوادونو سره نږدې اړیکې درلودې.</p>
<p style="text-align: justify;">ټرمپ د روانې اونۍ دوشنبې ورځ د امریکا د ولسمشر په توګه له لوړې وروسته وویل، که ریاض د ۵۰۰ میلیارده ډالرو په اندازه د امریکايي محصولاتو د پېرلو هوکړه وکړي، د خپلې لومړۍ دورې په څېر به خپل لومړی بهرنی سفر سعودي ته وکړي.</p>
